蔡楓華無悔失言：做乜要道歉？
也許，就是那一句「剎那光輝不代表永恒」，打蔡楓華落地獄，自此沾上黑運，霉氣纏身；也許，牌面上蔡楓華「冚旗」原因無可抗辯，但他並不認為欠了張國榮，一句：「我唔需要向張國榮道歉！」作風依然，他來回地獄仍有勇氣折返人間，何解？也許，都是為了張國榮。
點解「一剎那光輝唔代表永恒」呢句說話，要將我蔡楓華打落十八層地獄？再一次澄清，唔係呢句說話將我置諸死地，亦同我呢十幾年發生嘅不快事毫無關係，其實我同張國榮之間係冇嘢。如果我今次喺紅館開演唱會，Leslie（張國榮）嚟捧場，我一樣歡迎，我亦好想同佢fans講呢件事冇乜大不了，我同Leslie生前都知道，嗰句說話絕對百分之百係一個誤會。
純屬誤會一場
講呢句說話嘅原因，係當時我有首歌叫《愛不是遊戲》入圍《勁歌》季選，首歌原本可以得獎，後來唔知點解冇畀個獎我，而Leslie就喺紅館唱咗我呢首歌，就係咁引起誤會，自己情不自禁講咗呢番說話。其實當時我淨係睇到佢唱歌嘅片段，而睇唔到佢唱之前講過啲乜，依家我睇番，原來佢唱之前講過只要係好歌，佢就會唱。
當然，我當時唔係喺一個適當時候講適當嘅說話，當時盧敏儀截咗我講嘢，令我打唔到圓場，其實我想再講一剎那光輝唔代表永恒，但張國榮嘅光輝係一路延續落去。講完呢句說話，其實我同Leslie真係冇嘢，歷史明證，1986年我同佢一齊攞獎，我哋有傾有講，關係完全冇問題。歸根究柢，係因為當時兩派歌迷對壘，張國榮嘅歌迷就嬲咗我，件事先至被擴大。
1985年我係講咗呢句說話，但我強調，自己毋須向任何人道歉，亦都冇後悔，因為我根本冇錯，做乜要道歉？我完全冇後悔，點解我要後悔？因為唔係我失誤，純粹係一個誤會。盧敏儀截咗我講嘢，我冇辦法；兩派歌迷對壘，我亦都冇辦法。如果有辦法去通知張國榮歌迷會，我真係好想同佢哋解釋。
四大天王變天
真正令我事業滑鐵盧係失戀，同埋當時ifpi打官司，令我出唔到鏡，導致我去咗韓國發展三年，返到嚟就出現四大天王嘅變天。我唔覺得自己黑仔，一切都係人為，我唔需要講太多，總之公道自在人心，我始終覺得呢個世界係有公理。幸而蔡楓華並唔係得到憐憫，而係得到支持，係好正面，亦因為張國榮，我希望佢嘅歌迷會接受我，所以先出番嚟唱歌。
文：專案組 攝：秦健輝
場地：Hooray Bar