世界終結時…… 羅霖天家團圓
盛傳2012年12月21日是世界末日，當末日真的來臨，最後一通電話會打給父母、朋友抑或愛人？擁有幸福家庭的羅霖和楊婉儀，預備跟家人同度末日，還約定家人天堂再見！男模曾朗鳴則決定打電話給自己，回顧「有生之年」生活得開不開心；而徐子珊卻選擇正常地過……。
《中藝活動》
徐子珊正常生活 「當時有需要打畀邊個咪邊個囉！我會照常生活，呢啲冇辦法，嚟就嚟o架啦，我會選擇正常咁過。」
馬詩慧WhatsApp 「仲興講電話咩？梗係WhatsApp啦！」
王敏德誠心祈禱 「我會打畀老婆，然後喺心裏面唸經。希望同身邊嘅人手拖手，誠心向天祈禱。」
《環保時裝騷》
羽翹無悔一生 「會打畀爸爸媽咪，同佢哋講如果有來世一定要做番佢哋個女，不過我哋都冇分開過，所以都冇乜後悔！」
黃德斌打三條九 「打畀邊個？呢個時候梗係打999啦！」
蔣怡感謝父母 「會打畀爸爸媽咪，多謝佢哋生我出嚟，同埋做我父母。」
《女生天下綵排》
鄧伊玲謝謝媽咪 「我會打畀媽咪，咁多年都冇好好同佢溝通，講平日唔會講嘅嘢同埋多謝佢，都未嚟得切畀佢享福，對唔住佢。」
《慧妍雅集記者會》
楊婉儀天堂相見 「我會打畀先生，叫佢安排、照顧好小朋友，同佢講我哋天堂見啦。其實末日嗰刻我哋應該會一齊，一齊講開心嘢，約定天堂見。」
《皮草設計比賽》
羅霖 「我唔會打電話，到時同屋企人一齊，身為基督徒，我會抱住喜悅心情返天家，特別係有咗仔女之後，已經唔驚唔擔心死咗會點，最終會上天家。」
徐靖雯母女續緣 「會打畀媽媽，同佢講希望在下一個世界都可以繼續做佢個女，同埋好多謝佢一直以來對我嘅照顧。」
曾朗鳴自我回顧 「最後一個電話我會打畀自己，同自己傾偈，回顧吓咁耐日子以來開唔開心，因為好多人表面似係開心，其實內裏唔係。」