吳若希嗒糖 削足屈就
有「嫩版陳慧嫻」之稱的甜姐兒黃山怡（糖妹），遇上貌似日本AV女優羽田愛的美腿女歌手吳若希（Jinny），一個嬌小、一個高挑，Jinny更爆曾為糖妹而刻意着平底鞋。雖身為宅男女神，但兩女同聲同氣，希望不再單靠外表及暱稱取悅粉絲，而是憑實力得到外界認同！
經歷新人期後好迷惘
糖：糖妹 J：Jinny
糖：我哋係點識嘅呢？
J：我哋係前年（2010年）同期新人，亦喺音樂會上合作過。
糖：我記得呀，第一次見你時，第一個反應係：哇，乜咁高嘅！記得有次表演，我特登着高兩吋嘅鞋，因為唔想同你有咁大差距。
J：其實有次我都專登為糖妹着平底鞋啦！
糖：話時話，我同你依家都唔算新人，你有冇經歷過新人期之後嘅迷惘期？
J：都有呀，尤其係冇嘢做嗰陣，有段時間啱啱完成頒獎禮，又唔係宣傳期，未錄音亦未有新歌，個人有少少迷惘，好擔心冇晒方向，好彩公司安撫我，慢慢同我傾，傾完之後個人OK番，加上朋友亦安慰我，話第二年係咁o架，咁我個人又開通番，好快冇乜事。咁你又有冇試過？
糖：我冇經歷非常低落嘅日子，不過有時做歌做唔到心目中所想，心情係會爭啲。
J：做歌手好多時要睇公司安排，好似安排我獨唱或合唱都好開心，但始終公司唔止我一個歌手，同埋一個Team有人分擔唔同職責。
糖：講得冇錯，你加入樂壇時間唔算長，同邊個最熟？
J：你啦、同公司嘅Joyce（鄭欣宜）、許廷鏗，以及關心妍。你呢？
糖：你當然係其中一個，仲有Anjaylia（陳嘉寶）、蔡穎恩及HotCha嘅Regen等。
J：呢行除咗識多啲朋友外，最緊要係舞台經驗，我加入樂壇都有少少無心插柳。
糖：最初我真係諗住做model，但又唔想畀人定型為一個model。其實入行前我參加過歌唱比賽，又做過活動搞手，後來才與糖兄合作變成組合，真係冇諗過出到碟。
J：你同糖兄合作咁耐，有冇諗過拆夥？
糖：冇諗過喎，冇佢就冇我出現，我哋息息相關。
鍾意有上進心成熟男
糖：講完唱歌，講吓感情生活，你有冇心儀對象？
J：之前都有喜歡對象，但最後唔成功。
糖：初戀係幾時發生？
J：16歲左右，當時拍咗拖年幾兩年。
糖：你仲好年輕，可以慢慢揀男友。
J：但我好驚踏入「2字頭」。
糖：不過你咁鬼高，搵男朋友會唔會好難？
J：唔介意男友同我差唔多高。
糖：擇偶條件係點？
J：除咗成熟之外，最緊要有上進心，亦唔使搵勁多錢或者超級叻仔，年齡介乎28至35歲，因為依家20幾歲男仔，講嘢都未係好成熟。
糖：你鍾意成熟型男！
被指似AV女感難受
J：你成日畀人叫宅男女神，厭嗎？
糖：呢個名確係幫咗我好多，但同時又覺得好濫，其實好多人都OK過我啦，我想快啲搣甩呢個名。你都畀人話似日本AV女優羽田愛喎？
J：唉！冇得介意，初時係有少少hard feeling（難受），自問覺得唔似嗰位AV女優，但呢啲嘢控制唔到，當gimmick囉，希望靠自己實力畀人認識！
糖：咁又係，呢啲嘢又唔到我哋控制。
J：你都畀人話勁似陳慧嫻啦！
糖：問心又確實真係有啲似嘅，哈哈！
J：我都鍾意慧嫻，即係我都好like你囉！
糖：多謝晒喎！
採訪：專案組
攝影：黃叔榮
場地：gi