千嬅嫌子高囉嗦扁嘴先撇
佗着四個多月龍B的楊千嬅，前晚挺大肚與老公丁子高出席丁婆婆81歲壽宴，原本兩公婆又拖又攬恩愛前來，但酒席未散已見千嬅先行離去，身邊更不見近日寸步不離的丁生，據知愛妻心切的丁子高，全晚禁止千嬅飲酒，更不停催促要她早些返家休息，結果「烈女」千嬅嫌老公「囉嗦」自行走先。
千嬅不惜以37歲高齡為丁子高生B，並有指她肚中懷有的是龍仔，令丁家上下大為興奮。婚後對太太健康及飲食習慣已非常關注的丁子高，自太太有孕後，更變成緊張大師，嚴厲監管太太堅守大肚婆禁忌，如日前千嬅腳踩六吋高跟鞋出席公開活動時，她亦自爆為此遭老公黑面對待。
恩愛翹實落車
前晚丁子高在灣仔一酒店筵開9席，慶祝外婆81歲生日，千嬅兩公婆於晚上八時多結伴出現，由於天氣突然轉冷，身穿羽絨褸的千嬅翹實老公下車，當問到BB檢查完是否健康？千嬅還搞笑地說：「咩檢查？去食飯呀！」丁子高見老婆手舞足蹈地說話，即緊張地上前攬到千嬅實，然後乘電梯往壽宴。
直至晚上11時許，竟然發現千嬅僅在一名女友人陪同下落樓，獨自被送上車，記者上前問她肚中BB性別，千嬅扁扁嘴笑說：「我點知？我又冇X光眼。（點解丁生冇陪你落嚟？）我奶奶仲喺樓上。」
據知在席上丁子高繼續發揮緊張大師本色，不准太太飲酒之餘，又狂催太太早些回家休息，千嬅為免老公「囉嗦」惟有走先。
「總之唔係孖胎」
記者等到約凌晨1時半，即千嬅離開後兩個小時，終於見到飲到臉紅紅的丁子高現身，他還很有禮貌地面對鏡頭作揖兼雙手合十。問他為何沒有同千嬅一同返家時，丁子高說：「因為屋企人仲喺樓上，搵咗人陪佢上車啦。」至於問他千嬅是否佗龍仔？他同太太口徑一致：「你話呢？你話咩就咩啦！」然後獨自乘的士回家。
昨日再致電丁子高，他透露壽宴好熱鬧，邀請了八十多位親友出席，外婆當然好開心，至於問到是否在壽宴上太「囉嗦」，搞到千嬅要早走？他說：「我要留低招呼親友，所以安排千嬅走先。（千嬅個肚咁大，係咪孖胎？）都未知仔定女，總之唔係孖胎。」
文、攝：追蹤組