冼色麗向祖兒示愛
冼色麗（Bonnie）自02年出道至今，已參與過不少幕前演出，但比起新進o靚模仍欠缺知名度，直言不希望靠身材上位的她默默耕耘，務求令觀眾留下印象。早前她與容祖兒及劉浩龍等參演英皇電影《DIVA》，認識幾位知心好友，當中她更搞笑的向祖兒「示愛」來表達二人之間的友情。
密密接拍電影的Bonnie早前與容祖兒（Joey）、劉浩龍及杜汶澤等齊齊到內地拍攝新戲《DIVA》，久未到內地拍攝的Bonnie謂：「今次我哋係去內地一個大型嘅酒店拍咗大半個月，一大班人好似去度假咁，日頭拍完戲夜晚就去食嘢，真係好開心！」
真誠冇戒心
直言未試過工作得如此愉快的Bonnie直言是次最難得的是認識了知心好友，她說：「我喺戲入面做Joey助手，所以要好留意佢嘅一舉一動，我同佢都好傾得埋，好開心可以同佢做到朋友！」雖然對方貴為樂壇天后，但Bonnie就大讚對方為人真誠不造作：「佢好鍾意同人分享，又唔會對人有戒心，我最欣賞係佢仲保持到細路仔嘅心，真係好吸引我！」談及Joey，Bonnie更搞笑的直呼向對方「示愛」，狀甚老友。
收工圍威喂
談及電影拍攝的有趣之處，Bonnie就直言：「我哋真係好似去camp咁，最歡樂就係日頭拍戲，夜晚去食飯飲酒。」演出經驗豐富的她又直言是次拍攝令她建立了不少回憶及友誼，令她分外珍惜。雖然是次電影已拍攝完畢，但Bonnie就透露：「我哋依家都仲會keep contact o架，次次都係阿澤搞，不過因為大家各有各忙，所以都未有時間真係出嚟聚到！」
文：冰奇 攝：林楠
場地：McSORLEY'S Ale House＠Soho