爾冬陞喜試新 玩火放笑彈

小寶新作《大魔術師》開創了多個第一次：首次返內地拍戲、首次執導非自己原創故事、首次全普通話拍攝，他說：「我適應算快，偉仔同青雲起初都疑惑，偉仔普通話幾好，青雲有搵老師學，但佢錯咗照講。最難得搵到周迅演，夾偉仔、青雲而令觀眾信服，又唔介意個戲男多女少，我都搵咗好耐。」

有成績有權話事

小寶又指新作是刻意創新，他說：「有啲導演拍死一個題材，我樣樣都想試，唔熟嘅題材，你會恐懼、會專心啲拍，退休前我想拍多五、六部戲。今次拍魔術、拍火，係真火，香港人拍火好有經驗，之前S.H.E成員Selina出事，係內地人唔專業。（戲中你拍導演被賤視都好玩火？）開玩笑啫！唔使過分解讀我夫子自道，亦唔係我為同業伸冤，唔係同內地合作至有冤屈，唔開心唔好做，冇乜好怨，傾合約時講清楚，或者搵我做監製，情況唔係咁惡劣，拍戲係權力遊戲，你有成績，話事權就大，每行都係咁。」

偉仔與青雲在片中有不少搞笑場面。	影帝偉仔與影后周迅，同屬好戲之人。	偉仔在片中變成阿拉丁，大玩魔術。

夥拍演員講緣分

有指小寶原屬意找張栢芝演出《大》作為她的復出頭炮，但因條件談不攏合作不成更冇偈傾，小寶說：「同演員合作要講緣分，我唔鍾意被人勉強，亦唔鍾意勉強人，尤其係朋友，其實拍與唔拍都唔係乜嘢大損失，不過我想講，演員唔可以只以片酬高低去衡量，只有爛片至會畀個超高片酬你，因為佢要你去訛騙觀眾，但觀眾對演員係唔使畀面，佢會睇得出你嘅意圖。」

文：影視組