賈曉晨壓力大患情緒病
有「宅男女神」之稱的賈曉晨（JJ）近年獲無綫賞識，參演多部電視劇，事業愈見暢順，JJ直言好開心能夠入屋，希望往後發展也循演員之路逐步邁進。
JJ回想七年前來港發展，簽了經理人公司一心當演員，未料得到的是拍廣告及做「天使」的工作，令她對前途感到茫然：「原來現實同理想係會有距離，初初我係抱住可以拍好多電影嘅心態，後來發現原來冇乜戲拍，真係幾不知所措。」
依家睇開啲
雖然拍廣告、做歌手可以令她密密賺錢，短短幾年間已儲到第一桶金，目前中、港兩地皆有物業的JJ對事業感到迷惘，更自爆為工作諗到有情緒病：「我諗我之前都有啲情緒病，我覺得成條路係行得唔好，因為我搵唔到方向，後來想通咗，每個人都會有壓力，睇吓承受壓力嘅能力可以幾多，我依家都有壓力、都辛苦，但可能有啲人壓力大過我十倍，所以我依家會睇得開。」
「由低做起」
今年獲無綫賞識的JJ，連續接拍多部劇包括《怒火街頭2》、《缺宅男女》等，令她真正感到滿足，現時才feel到真正鍾意做咩：「雖然我接演嘅角色唔係主角，唔係超多戲份，但我覺得可以一步一步嚟！」對於有傳其大老闆陳國強入主無綫，JJ才獲得機會，她對此不認同說：「雜誌話大老闆買咗TVB，所以令我喺TVB發展得好好，我覺得好奇怪，入行以來我所有嘢都係一步一步去做，未試過突然間畀好大機會我，每一次都係做最低層開始，到依家都唔係擔正，明眼人都睇到啦。」
文：專案組
攝影：黃叔榮
場地：華星冰室