Lynn見狂迷爆樽 驚青撤退

熊黛林（Lynn）、杜汶澤（阿澤）、黃百鳴等前晚宣傳新戲《八星抱喜》，於遊戲環節期間，由Hardpack成員Kevin假扮粉絲，上台欲擁抱阿Lynn，被要求落台的他突然爆粗，工作人員即上前拉他下台，此時Kevin卻手持「道具樽」衝回台上，襲擊司儀溫超的頭部，「道具樽」爆裂後碎片四濺，效果逼真，大批工作人員出動制止他，其中包括假扮保安的Swing成員Jerald，場面一片混亂！

眼見「狂迷傷人」，嚇得「眼都凸埋」的阿Lynn急急退到台下，並由經理人陪同下走先。當她得悉乃整蠱事件後才返回現場，她說：「好驚，咩都唔知，想即刻走。（玩大咗？）個效果會好啲。（唔嬲？）如果做到宣傳係OK。」

溫超「受傷」倒地，受驚的阿Lynn急急撤退。	阿Lynn嚇到花容失色，要由經理人陪同離去。	奸計得逞的阿澤與「粉絲」Kevin興奮歡呼。

阿澤怕得罪城城

原來電影公司與Kevin合作，希望以此用作《八星抱喜》的幕後花絮，而事前得悉此計劃的阿澤曾勸阻不要以阿Lynn作目標，他亦於混亂中受了輕傷，他說：「個鼻擦損咗少少，之前其實有排練過。（阿Lynn同城城投訴？）出嚟行就顧忌唔到咁多，城城有王者風範唔會咁小器，都係玩吓啫，不過講講吓有啲驚。（道歉？）一世都唔會講！大家為電影宣傳，佢會諒解。」而黃百鳴笑謂見到阿Lynn離去好好笑。