戴小奕盼除災難
新的一年已開始，去舊迎新是指定動作，人人都想忘記不快舊事，迎接新的好事，明星藝人們也不例外，莊思敏想送走2011年失戀的傷痛；戴小奕望2012年去除所有災難。
戴小奕
「內地有好多需要幫助嘅人同唔健康現象，好多人話2012年係末日年，希望新一年可以去除晒所有災難，每個人都得到和平安定嘅生活。龍年係活躍同活潑嘅，希望人人都充滿生氣。」
工展會影集發布會
莊思敏想做差婆
「我想送走啲唔開心嘅經歷，好似失戀咁，工作上不如意嘅事都想送走佢。迎新方面，我想試吓拍電視劇，最想做專業人士角色，好似消防員、警察咁，有新挑戰。」
何紫綸主攻大陸
「我想送走間舊屋，搬間大屋，因為我有太多衫，唔夠地方擺。新一年希望多啲嘢做，多啲大陸fans，我依家喺內地做儀態導師教女仔儀態、飲紅酒禮儀等等，想佢哋高貴啲。」
林熹瞳拒爛桃花
「我想送走啲霧水情緣，唔要爛桃花，唔想再有情傷，自己都有同人約會嘅，新一年都想迎接新情緣。」
趙哲妤龍飛出天
「我希望唔好再有天災人禍，同埋應承咗男朋友同家人，建立好形象唔行性感路線。新一年希望自己能夠『龍飛出天』，愛情事業兩得意。」
香港國際時尚薈萃
Ana R.無敵是愛
「我想除去所有唔開心嘅事同埋負能量，等自己喺新一年可以開心啲同正面啲。迎接更多嘅愛，無論係家人、朋友定另一半，希望大家都可以有更多愛去分享畀身邊嘅人，更有衝勁同熱情。」
姚予晴搣甩惰性
「想搣甩自己嘅惰性，如果要工作我幾早起身都冇問題，但當唔使工作時，我會有懶惰嘅一面，會賴床唔願起身、懶惰唔願執屋，都想改咗佢。迎接新一年，希望我嘅工作安排得密密麻麻，搵多啲錢，同埋買樓自住。」
倒數狂歡活動
Marina V.擴闊視野
「上一年我過得非常開心，好好，冇乜嘢想忘記同去舊，因為都係回憶嘅一部分，所以冇嘢想忘記。新一年就希望可以接觸新事物，擴闊自己嘅視野。」
貝安琪送走天災
「我希望送走啲天災人禍，世界和平！新一年我希望迎接多啲拍戲機會，拍多啲戲，同埋最想拍動作片，可以將自己學嘅瑜伽動作加入戲裏面。」