糖妹向鍾一憲逼供：喜歡男定女？
「宅男女神」糖妹黃山怡及憑合唱歌《勾手指尾》上位的男歌手鍾一憲（Jason），各自撇下「另一半」糖兄及麥貝夷約會傾密偈。原來兩人已相識七年，經常互訴心事，互窒互寸。早前被爆「斷背」的Jason，更遭糖妹當場鬧着玩質問：「其實你鍾意男定女？」場面搞笑！
糖：糖妹 鍾：鍾一憲
話當年傾到天光
糖：今次係我哋入行後，第一次撇低「另一半」坐埋傾偈，原來我哋識咗七年。
鍾：真係幾感觸，大家咁多年都追尋唱歌夢想。
糖：嗰時參加歌唱比賽，差唔多日日見，雖然之後各有各忙，但都保持聯絡。前年（2010年）大家喺樂壇重遇，做埋同期新人，加上我哋係同月同日生，所以特別啱傾。
鍾：我哋性格有啲似，大家係天秤座，而且都幾煩，有人話我係「男版糖妹」。
糖：我希望你快啲開演唱會，因為你唱女仔歌冇問題，呢樣嘢好堅，好唱得。
鍾：你唱低音仲勁啦，真係o架！平時都用男人聲同我講嘢。我細個唱K，啲人話我把聲「老牛」，之後我咪成日唱歌唱得好高音，搞到連講嘢都高音埋。
糖：你第時會自己開個唱，抑或同麥貝夷一齊開？
鍾：我想同你開喎。
糖：不過你冇嚟我演唱會囉！
鍾：嗰日諗住去，但接咗工作，所以冇去到。
糖：嗰晚演唱會播番我哋七年前嘅合照，大家好「青葱」，好多人話估我唔到，放咁多醜嘅相，講緊係我當時好醜。
鍾：我唔係好認得相中自己，啲頭髮好長，好騎呢，個樣圓咕碌，好細路仔。若然唔係有糖兄或麥貝夷，可能我哋依家一齊合唱咗。
糖：仲記唔記得當年我哋喺商場門口傾偈傾通宵？
鍾：記得，當年做完嘢已經好夜，但又想搵人傾偈，結果兩條友一傾就傾到五點！
爆緋聞各有杯茶
糖：雖然經過「七年之癢」，唔知點解我哋完全過唔到電？
鍾：可能我當你係仔，你當我係女啩？
糖：可能係咁啦，我大你一年，好似照顧小朋友咁，但唔會當係細佬囉，你咁高！
鍾：邊高呀？玩嘢咩？我哋走最矮路線，而且我哋太熟，根本唔會過電，熟得滯會冇咗新鮮感。
糖：男人！貪新鮮！
鍾：我哋當初冇過電，後來各有自己生活，但將來嘅嘢好難講呢！
糖：你同麥貝夷夠日見夜見啦？
鍾：但佢唔係可愛型，我揀女友嘅條件，N年來冇變，都係可愛型、牙齒要白、有笑容，同皮膚黑黑哋。
糖：使唔使介紹畀你識？其實你鍾意男定女o架？
鍾：咁你鍾意男定女吖？
糖：我鍾意男人。
鍾：我好怕女仔太黐身，鍾意同啲傾得埋嘅女生一齊，因為我非常鍾意講嘢，若然拍拖冇乜兩句，好快byebye。咁你擇偶條件又係乜？
糖：講咗十年喎，都係陽光笑容同埋高大囉，你唔夠大隻呀！
傳斷背怕累咗人
糖：我哋平時一見面就傾心事，一嚟就好入肉。
鍾：你問啲問題又係幾尖銳。
糖：你之前畀人傳「嗰單嘢」（指斷背），係咪真o架？
鍾：唔係啦，開頭有啲唔開心，怕累咗人，啲相又唔係乜嘢親密相，後來我明白做一個娛樂工作者，會成為人哋茶餘飯後話題，起碼有人識都係好事。
糖：報道出咗後，我係出於關心去八卦件事，畀着係其他人我唔會理，但係關於你我就會問，呢啲報道好快就過。
鍾：正如去年你畀人爆咗結婚單嘢，我都話乜搞到咁大？糖妹真係好紅呀，正呀！加油！
糖：唉！呢單新聞累我冇咗一日假期，不停接電話。
網絡神話極速爆紅
糖：原來我哋都因為網絡文化而畀人認識，我啱啱接觸娛樂圈係由網絡開始，到有機會做歌手，亦靠網絡討論及傳閱，多咗表演機會，同時最緊要係有人搵我哋做騷。
鍾：我都覺得好開心，首歌喺分享網站有成二百幾萬點擊率，網絡效應好理想，的確多咗機會畀人認識自己，同之前嘅對待好大分別，識多咗唔同層面嘅人，形象亦都入咗屋。
糖：唔識鍾一憲，都識《勾手指尾》。
採訪：戶冊平
攝影：沈健程
場地：gi
服裝：WrongWroks@superbored