Eason生龍生蛇十五十六
坦言希望「追多個」的陳奕迅（Eason），昨日出席簽唱會時，被問到可有意追個龍B？鬼馬的Eason竟一時未能決定生龍B還是蛇B好，笑言要回家諮詢太太。
Eason昨日為新碟舉行簽唱會，無綫與「四大」唱片公司「破冰」後首次派採訪隊到場，據知此安排與早前陳慧琳等四大歌手亮相無綫一樣，因場地揼本買下廣告時段才「重生」。對於接受無綫採訪，Eason發揮搞笑本色對「咪牌」說：「好耐冇見，你嘅線條靚咗，以前都唔覺。」他坦言新一年新開始望繼續有機會與無綫合作。
追B唔使問囡囡
Eason與歌迷齊齊提早迎龍年，大吃賀年食品糖蓮子，被笑問是否寓意龍年努力造人？一時間Eason未能決定在龍年還是蛇年生B好，笑言要先向太太諮詢，他說：「始終係兩個人嘅事。」
問Eason是否要問囡囡康堤？他說：「點解要問？我返去問下我阿哥當年父母生我嗰陣有冇問佢先。（想生？）都想，但成日公開講呢個問題有啲尷尬。」
勸古巨基繼續唱
此外，方大同成為「叱咤」大贏家，被指因Eason曾揚言將不再出席頒獎禮，對方即受力捧成為其接班人，Eason說：「唔好咁講，之前話唔去係想多啲時間陪個女，多年之前啲人都話我係張學友接班人，其實我哋都返緊工。」
另有報道指古巨基將於今晚《勁歌》頒獎禮四奪「最受歡迎男歌星」後宣布退出頒獎禮，Eason就說：「大家睇電視咪知囉。（少咗個對手？）我受嘅灌輸係唔攞獎即係退休，見到面會鼓勵佢繼續唱。」
文：音樂組