DaDa 阿旦鴛鴦浴Big爆缸
「百果園咪神」陳靜（DaDa）與「E Cup教主」鄧伊玲（阿旦）昨日低胸現身綵排活動，兩人自爆將會成為同居密友，新居設有按摩浴缸，二人可齊浸鴛鴦浴，但不怕發展成斷背情及阻礙彼此的桃花，深信桃花運會打孖嚟！
同擁有逼爆上圍的DaDa與阿旦，昨日齊齊以性感裝束出席女生天下綵排活動，DaDa透露帶了「吉祥物」來綵排：「之前去睇相，話紅色旺我，所以我今日帶咗幾件紅色貼身衣物嚟。（包括紅bra？）係呀，紅色仲有助運程同戀情。」此時身旁的阿旦即宣布二人將展開同居生活，成為彼此的另一半，更興奮的說：「新居有個浴缸，我哋可以一齊浸浴。（唔驚發展成斷背情？）唔會。（新居會否男生止步？）女仔無任歡迎，男仔就要先過目。」
桃花可能打孖嚟
DaDa自言是個孤獨的人，與阿旦同住可以互相照應，不怕因而阻礙桃花？她倆異口同聲說不會，反而認為桃花可能會打孖一齊嚟，若然真的要帶另一半回家，或許要在房門前掛上「請勿打擾」的木牌，DaDa說：「阿旦會為我物色適合嘅對象。」早前才置業的DaDa有意放盤，她預計樓價會下跌，想賣樓套現，有資金在手，之後可以細樓換大樓。
蔡恩真撐沈志明
同場還有韓模蔡恩真、o靚模蔡穎恩（Evelyn）、鍾采羲等，蔡恩真與萬寧哥哥沈志明傳出緋聞，她強調彼此是特別的朋友，沒有拍拖：「我哋都經歷過困難時期，互相支持，佢想做個好人，之前只係唔識得處理誘惑，控制唔到自己，先出現好多麻煩，我相信佢係個好男仔。」雖然她沒有看中文報紙，不清楚早前他與16歲o靚模Cammi發生的不愉快傳聞，但相信他的為人，更認為此緋聞傷害了沈志明。
而Evelyn則說若跟舊愛Tom同場不會感到尷尬，碰面定會打招呼，更不怕被人認為他倆再見不是朋友，她說：「呢啲大家知就得，人哋咁諗都冇辦法，如果夾硬逼我哋，反而似娛樂緊大家咁。」