李思捷夜店攬女街頭掃背

「福祿壽」靠扮嘢爆紅，三子搖身成為無綫收視福將，紅到拍電影兼闖紅館開演唱會，事業發展順利之下，成員王祖藍、阮兆祥及李思捷情路亦各有各精彩。當中阮兆祥和李思捷雖有穩定女友，照樣有女黐埋身，阮兆祥背女友約何傲芝買枕頭傳緋聞，至於李思捷雖然與比他年幼17年，樣靚身材正的美味天使「春卷」王宝宝拍拖兩年多，早前同樣被爆約會陳年「世界妹」李思蓓，搞到要急氹春卷補鑊。

懶理性感兔女郎

經歷偷食危機不久，李思捷前晚再度出擊夜蒲，今次挑選隱蔽的尖沙咀樓上酒吧，當晚有主題派對，場內充斥不少性感打扮的兔女郎，露肩又露腿地陪玩。李思捷一身西裝打扮到場，雖然有兔女郎主動撩玩，但李思捷似乎興趣不大，不停和男友人摸酒杯底傾偈，未幾，一名打扮斯文，樣貌和巨聲幫林欣彤甚為相似，只是身形較圓潤的甜美女郎來到，這名「圓潤版林欣彤」和李思捷熱情地打招呼，立即熟落地黐埋一堆密密傾。

李思捷手持威士忌和「圓潤版林欣彤」愈傾愈埋，更一手將對方攬入懷，女方笑笑口狀甚受落，思捷有女在懷特別開心，攬背之餘隻手不時上下掃，繼而更頭貼頭地施冧功，表現得如同在舞台上一樣落力。至凌晨兩點半，思捷逗得女方不時甜笑，兩人在另一男友人陪同下離開，行了不到半條街，思捷急撇男友人，攬實新女齊齊趕下場。

一攬入懷	愈哄愈埋 李思捷扮嘢叻，氹女同樣有一手，攬實女伴頻頻施冧功。	掃背離場 短頭髮打扮斯文的「圓潤版林欣彤」，被李思捷攬實離開。
場內有性感兔女郎主動撩玩，李思捷卻不太感興趣。	李思捷和春卷拍拖多年，近日屢傳搭上新歡。

解畫愈講愈混亂

夜店攬女斷正，昨日記者致電李思捷，他初時說：「係！個女仔係做飲食嘅朋友嘅夥計，一大班人去囉。（你掃背喎？）肯定冇。（有相喎？）咁呀！類近嗰啲囉，總之佢係一個好Close嘅朋友，可能傾偈埋咗啲啫。（佢都好可愛喎？）哈哈哈！我呢期唔係呢隻Type喎！（又影到攬女驚唔驚春卷嬲？）如果我攬男仔佢就嬲！總之佢唔會嬲啦！（咁你同春卷係咩關係呀？）總之佢係我好Close嘅好朋友囉！」由朋友嘅夥計變成好Close嘅朋友，李思捷愈答愈亂，最後連拍拖兩年多的春卷都只落得「好Close嘅好朋友」稱號。

文、攝：追蹤組