韋彤聖殷sell青春 殺入樂壇
周秀娜師妹韋彤（前名江怡）和聖殷（CoCo）去年組成「Lemonbeez」，以sell青春可愛路線殺入樂壇，兩人決意不與同門的Jeana（何佩瑜）和Mia（陳靜儀）一樣行性感路線，上圍甚有睇頭的韋彤被問為何封胸？她說︰「冇得解，之前做新八模試過性感，但做咗一年想轉吓形象。」她直言不怕密實打扮會流失宅男粉絲，更拿凍檸檬茶作比喻，她說︰「如果你平時下午茶都飲凍檸檬茶，飲得多有時都想清清哋，叫杯少甜飲吓，我唔係全部時候都封胸，有時少少性感都可以，睇工作需要啦。」
互笠高帽
至於另一成員CoCo剛簽約模特兒公司不久，便與韋彤以組合姿態工作搵銀，雖然兩人相識日子較短，但一拍即合，半年多已令她們感情大躍進成為好姊妹，CoCo說︰「大家有好多話題，之前見面可以傾足大半日，加上我喺澳洲讀書返嚟香港，生活模式要慢慢適應，但韋彤好照顧我。」身旁的Waye則不斷讚CoCo上進和吸收能力快，又自言與CoCo的美貌夾到絕，期間兩人不斷互笠高帽。
雞啄唔斷
兩位好姊妹去到邊都雞啄唔斷，見此兩人的公司安排她們組成全新組合「Lemonbeez」，並且嘗試於歌唱事業方面殺出血路，同時圓了韋彤的唱歌夢，韋彤對成為新組合顯得十分雀躍，她說︰「見到公司Model可以組成不同嘅『beez(蜜蜂)』組合，自己亦恨咗好耐，所以會更加努力，有信心會有好成績。」
攝︰劉智源
場地︰Kaiko
服裝︰Uuu...shooop