林淑敏抗癌心路：學懂放鬆

眼前一頭清爽短髮的林淑敏，精神飽滿地接受訪問，完全看不出她曾經患過乳癌。Mandy透露目前會定期到醫院進行標靶療程，康復進度十分理想，一向性格樂觀的她更笑說：「依家入到醫院已經熟晒，好似返到屋企咁！」

唔需要同情

經過一年時間養病，Mandy近日亦重返無綫，首個任務是主持節目《都市閒情》，她說：「我第一次做主持工作，依家都係邊學邊做，有乜唔明就會問拍檔，所有同事都對我好好，但又唔會當我一個病人咁遷就我，咁樣我反而覺得開心，因為我唔需要同情，當我係普通人就最好。」

林淑敏（右）經常出席講座，與女士們分享患乳癌的經歷。	林淑敏養病一年，終重返無綫擔任主持工作。	患癌期間的林淑敏。

Mandy直言患上乳癌期間，自己也從未想過放棄，她說：「我唔覺得自己要悲觀，我見過好多患癌嘅人真係好辛苦，但佢哋都冇放棄，同埋雖然有病係會辛苦，但我總相信唔會24小時都咁辛苦，總有啲係自己值得開心快樂嘅事。」

日瞓四粒鐘

經歷乳癌一劫，Mandy對人生有全新啟發，她說：「上個月羅慧娟問我人生有咩計劃？講真我病之前有好多計劃，我要keep住自己好忙，唔係覺得好冇安全感，當時每日瞓四、五個鐘就夠。」

患病之後，Mandy即將密麻麻的時間表重新編排，她說：「我有咗新嘅啟發，就係要放鬆自己，以前會好努力令自己擁有更多，但就失去健康，依家學識放鬆，同埋會放多啲時間去搵屋企人同朋友，個心自然會好滿足，放鬆自然驅走百病。」

文：呂曉風 攝：沈建程

場地：Zip Cafe

服裝：Club Monaco