林欣彤養靚聲唱爆紅館
有「小巨肺」之稱的樂壇新人林欣彤（Mag）2011年可謂大豐收，繼推出處女碟大賣三萬隻後，又接拍電影《DIVA》與《起勢搖滾》，再開了個人首個音樂會，公司高層吳雨更放風今年將為她搞紅館演唱會，作為一個新人，實在是前途無可限量！
去年林欣彤工作甚多，出碟、音樂會、拍電影一應俱全，以新人來說，實在是發展極佳，而英皇高層吳雨更曾公開表示今年要幫Mag搞紅館個唱，難怪阿Mag大表興奮：「都好大壓力o架！其實我都未係好適應呢行，如果要搞，我希望公司畀一段長時間我休息同準備，如果休息唔好，聲帶一定會有問題，有咁好機會做得唔好會好唔開心囉！」以阿Mag的工作量來說，可有六位數月入？她謙稱：「都冇計月入幾多，因為呢行好唔穩定，但都算好好囉！」
街坊認出
林欣彤說過想買更大的單位供家人居住，如今賺到盆滿缽滿，可考慮畀首期買樓？她表示：「夠畀首期都冇可能依家買，太貴啦！依家一家四口同一隻狗喺大埔住500呎單位，將來唔一定要千呎大屋，最緊要落街有公園，空氣唔差，因為我好易敏感。如果可以寧靜啲更加好。」問她平時遛狗可會被街坊認出？她說：「都有，（享唔享受？）一半半，我想多人認識我係為咗我嘅歌聲囉。」
感情空白
感情生活方面，阿Mag經常與樂壇新人胡鴻鈞、羅孝勇及藝人陳家樂三人名字扯上關係，問她可會覺得煩？她說：「都冇咩嘢，只係每次訪問都會問，我同佢哋都唔會尷尬，冇特別感覺，亦冇避忌。（想唔想拍拖？）會想，但依家冇鍾意嘅人！」
文：王羽飛 攝：謝國華