杜汶澤拒hea場 跟倉田學武
杜汶澤一向工作認真，早前便為主演的動作片正式「拜師學藝」，跟日籍演員兼偶像學武！結果被老婆取笑他緊張得似小學生去旅行般。談到恩師，阿澤讚不絕口，更自爆小時候曾為對方「茶飯不思」。
阿澤片約不絕，最近便與導演邱禮濤「靜極思動」，打算年中開拍一部由真人真事改編而成的劇情動作片。戲中扮演武打巨星的阿澤不想欺場，月前在前輩邵音音的引薦下，正式跟年屆60餘歲的日籍演員倉田保昭拜師學藝，由基本功重新學起，務求練得一身空手道真功夫！見慣大場面的阿澤不諱言：「拍戲咁耐都冇試過咁緊張，我之前嗰晚瞓唔着，老婆笑我好似小學生去旅行咁。」
操半年未夠喉
原來阿澤小時候深受倉田影響：「我自己真係唔記得，不過我阿媽話我細個時成日坐喺電視機前，追睇佢主演嘅經典電視劇《猛龍特警隊》，大明星喎！雖然依家上咗年紀，但佢身手依然非凡，仲親身落場教我添呀！」阿澤被讚相當認真，他坦言：「唔想好似時下啲年輕人咁，拍戲前求其走去上幾堂，擺下姿勢就算數。雖然都仲有成半年先拍，我仲驚唔夠時間添。」
太太感動落淚
刻下尚有8部戲未上映的阿澤，揚言今年檔期已排到7月，記者笑指他「豬籠入水」，他慨嘆謂：「千祈唔好咁講，我發霉嗰時大家唔知啫。」早前他與江若琳合拍《高舉愛情》，電影MV已剪輯成功，阿澤笑謂：「雖然小成本製作，但我太太睇完相當感動，喊到收唔到聲。」
文：影視組