糖妹愛大咪 徐淑敏 恨的骰
當「宅男女神」黃山怡（糖妹）遇上「港姐咪神」徐淑敏（Suki），原來有說不完的話題。糖妹笑言要做「咪神」Suki接班人；Suki則喜歡糖妹「的骰」高度，又踢爆她是「多情女生」！
糖：糖妹
徐：徐淑敏
咪神Vs宅男女神
糖：我哋今次做《甜姐兒》係第一次合作，以前我有睇你演出，吖！呢個女人又喺度食嘢，但又幾開心，我對你印象都好「膚淺」。
徐：點為之「膚淺」？我唔明。
糖：即係唔算深刻印象，有啲歌手唱首歌你都記得，你唔係呢啲，只係點解個個飲食節目見到你？你就好啦！
徐：我做過兩個飲食節目咋，之前有做《最緊要正字》。
糖：「咪神」係咪嗰度起家？
徐：唔係，選港姐嗰陣都未係，嗰時太瘦，反而出咗一年台慶，之後就有呢個稱呼。
講出口恨拍拖
糖：你咁早結婚仲生咗兩個女，會唔會令宅男對你幻想破滅？
徐：唔緊要，大把接班人，你都係其中一個！
糖：其實我想做「咪神」多過「宅男女神」，如果可以喺你身上拎走一樣嘢，我最想有「咪」，一半都得啦，仲有要好似你咁瘦、「水腫」嘅身形，因為我唔想要肌肉。
徐：多謝你呀，明讚暗寸，我就想要你嘅高度，因為好的骰，會有更多人保護，你唔覺得身材矮嘅人聰明啲、多計啲？好似王祖藍同曾志偉，不過我覺得你都好多情，一時鍾意陳智燊，一時又鍾意柯震東。
糖：好多「對象」都係講之嘛，用嚟擋住傳媒訪問，哈哈，全部係遙不可及，你介紹男仔畀我識仲好！
徐：但我啲男性朋友冇邊個type係你鍾意，同樣佢哋又未必like你呢個type，佢哋鍾意丁丁（丁樂鍶），你太吱喳，哈哈……
男人經．數「擇」男
糖：麥玲玲話你啲事業運又返嚟？
徐：話我事業運30至40歲會好強。
糖：「事業線」都係？打孖上？
徐：若然我轉行做生意，就唔需要「事業線」，要收埋！
糖：會唔會嘗試拍劇？定只係集中做主持？
徐：時間上唔容許（拍劇），要湊女，夜晚要喺屋企，如果拍劇至少拍足三個月先拍完，每日只瞓得兩三粒鐘。
糖：你老公唔捨得你捱？
積極追求真愛
徐：咁又唔會，佢係做嘢認真嘅人，要全情投入，佢亦支持我做嘢。
糖：老公教你好多嘢？
徐：教好多呀，我本身擇偶條件係要個男士好叻，我喺每位男士身上學到好多嘢。
糖：「榨乾」知識！
徐：你鍾意可愛同幽默感男生？
糖：呢個moment係囉！我唔係認叻，我都想成家立室，但我唔想唔知頭唔知路嫁咗去，我會慢慢嚟，要真愛嘅。
徐：我好有planning o架，你唔知咋！
糖：我知，其實你依家有美滿家庭，又成日講自己個女，又或者得閒打電話畀老公，可以做自己想做嘅事，都真係唔錯，好圓滿！所有男人已經得唔到你呢個宅男女神。
獨門方法理是非
徐：等我過兩招畀你啦，我知你愛情觀係比較主動追人，我嗰時都係，但有啲男士慢熱，會畀你嘅舉動嚇親o架。
糖：我好明顯唔會揀慢熱型，我會揀熱情如火。
徐：之前傳過你結咗婚？我就係嗰時開始留意你，同埋我相信段報道呀，哈哈……
糖：膚淺兩個字已經鑿喺你額頭！
徐：其實我都係喺是非中起家。
謠言不攻自破
糖：點樣抗拒是非？
徐：我哋處理是非方式唔同，我選擇唔睇，你就選擇面對。我啲是非好多唔係真，但又有人睇，搞到冇晒反抗能力。
糖：我嗰啲是非根本就唔使反抗，因為不攻自破。你要聽多啲糖兄妹嘅歌，因為充滿正能量。
徐：除咗唱歌之外，我覺得你好適合演古裝，扮相應該幾嬌俏，可以殺出一條血路，對內地市場有幫助，快啲爭取機會啦，我覺得你拍戲更容易彈起。
採訪：戶冊平
攝影：沈健程
糖妹服裝：Collect Point
徐淑敏化妝：Tiffany Fong