連詩雅暫忘感情密密搵銀

連詩雅除熱愛唱歌外，原來她亦多才多藝，對畫畫及攝影充滿興趣，平時會行到邊影到邊，記錄生活的點滴，並把相片放入相簿作為回憶。她說︰「我除咗由細到大畫畫外，仲好鍾意影相，我係一啲好原始嘅人，要曬相出嚟擺入相簿，因為人生發生好多事，但你未必可以記得好清楚，所以得閒我會拎相出嚟勾起我啲回憶。」Shiga坦言入行後拍照的機會反而比以前少，不過一有時間亦會拿起相機過攝影癮。

冇影親密照

Shiga透露相簿中大多是家人及朋友的合照，問有否與過往的男友拍親密照？Shiga笑說︰「幾親密先？我冇影過呀，反而之前會同男友周圍去影相，甚至去好遠嘅地方食嘢，但只係影低當日嘅回憶。」她表示希望把自己由細到大的作品出畫冊及展覽，跟別人分享自己的回憶。

忙到冇拖拍

提到這一年的回憶，Shiga表示出道第二年過得非常充實，除唱歌外更可接觸演戲，她說︰「上年出道只係唱歌，但今年可以拍戲，好開心可以學到好多嘢。因為我喺呢一行年資淺，所以想新一年嘗試更多嘅嘢。」除專注事業外，問現時單身的Shiga會否於新一年找番個男友？她聞言後笑說︰「以前我係嗰啲戀愛大過天嘅人，但依家未必一定要有伴侶，身邊有知己已足夠，加上我想放多啲時間喺工作上，真係會冇時間去諗感情嘢。」

文︰藍裕彤 攝︰韋芷茵 服裝、場地︰GUESS