基仔：林夕冇影一定摷到底

入英皇先跟楊生正式認識，我真的好佩服他，大家印象中老闆除了英皇娛樂，仲有好多生意，又地產、又珠寶，做生意咁成功，你以為他的時間全放在生意上，但事實並非如此。老闆對所有事都親力親為，對員工都好友善，記得晒所有員工個名，會關心每位藝人的工作。我仲聽Mani（霍汶希）講過老闆會睇晒所有娛樂版，你想像吓一個生意大忙人，仍然關注到公司裏面的歌手動向，他的魄力令人敬佩，他讓我知道一個好老闆成功是有原因，因為他對員工都好，公司才會得到一個團結氣氛。

讚陳志雲淡定有將才

陳志雲是我認識的朋友中EQ最高嘅一個，他心地好好，好識得開解人，懂得顧及別人感受，他的口才又叻，好有個人魅力，平日大家見面食飯都是閒話家常，不會講工作。我記得他曾經講過，即使面對困境都唔好亂，他一向好淡定、好有大將之風，不過可能大家唔知，其實他模仿力好高，他扮過吳雨大哥個樣畀我睇，真係勁似。

林夕（左下）這位論盡才子，最教基仔掛心。

友善的楊受成（右二）能和基仔、容祖兒（右）等打成一片。

至於林夕，因為工作而接觸，後來成為好友，我哋會傾電話傾心底話。阿夕好叻，乜都識，大家以為他是個文人，事實上他家中書櫃包含着不同種類的書籍，包括文學、宗教、財經、漫畫等等，他鍾意睇書，書本是他生活樂趣的重要一環，他真係博學多才，是我見過最才子的才子，甚至古董、投資他都識。不過他是我這麼多朋友中，最令我掛心一個，因為他是獨居，但個人好「論盡」，煮碗麵都會整傷腳，所以每當搵不到他就好擔心，一定要摷到他為止。