慧眼超盈繆思女神
何超盈好友陳柏熹雖然並不熱忱節日，但卻能設計出節日派對中華麗的晚裝，令女性輕易成為焦點；他坦言超盈獨具慧眼，啟發他不少靈感。在這普天同慶的日子，陳柏熹打造聖誕索女，教大家如何成為派對女主角。
眾所周知，Moiselle太子爺兼創作總監陳柏熹（Harris）與賭王四房長女何超盈十分老友，超盈還多次着上他設計的服飾行騷，Harris說：「超盈係好特別嘅女仔，佢畀我明白女性可以有好多不同的想法，例如當大家見到同一樣嘢，佢卻可以睇得更深入，有自己一套獨立意見，從不會被人左右，好有主見，畀咗我好大啟發。」
愛反傳統設計
Harris揚言設計服裝最愛反傳統，對於派對服飾，他表示要有霸氣：「我設計嘅衫要可以壓場，要成為眾人焦點女主角，啲衫唔一定要好閃，但觀感上有立體感，可以好貼身，於細緻位突出設計。配搭上如果有強烈對比，會好玩啲，例如好女性化的設計，可以加啲皮革、窩釘，或者西方嘅節日，着中國式嘅旗袍，要反傳統。」
最忌太過累贅
對於聖誕派對裝扮，Harris表示：「金色一直係節日必備，而復古Look亦是選擇之一，懷舊喱士、珠片、立體小花，放在貼身的晚裝上，更能展現古典美。另外絲絨質地亦是今年最愛，因富彈性，即使簡單的貼身剪裁，已可凸出線條美。」至於派對上最忌，他說：「最忌太多Focus，例如紅色已好搶鏡，仲加唔同顏色嘅配搭，或一大串首飾，將所有重點擺晒上身，變得太過累贅。」雖然對派對服飾瞭若指掌，但卻並不愛節日，他說：「節日令我不知所措，好似一定要搵啲節目，如果冇節目，唔知點咁，但我鍾意即興，唔想事先計劃、安排好啲嘢。」
文：名人組