湯盈盈見錢嘉樂即時笠水

湯盈盈與黃德斌於劇集《天與地》飾演夫妻，盈盈大讚對方做事很用心，又有幹勁。她坦言喜歡工作認真的男士。提到緋聞男友錢嘉樂工作時亦很認真，盈盈笑謂：「我未同佢真正合作過，之前都係一齊拍遊戲節目，未試過正式拍劇。（想唔想同佢合作？）咁我又唔想喎！因為個個都話我見到佢就即刻變『笠水王』，個樣好似畀佢食住咁，不過呢個只係表面。（背後你食住佢？）唔知呢！」

未有計劃結婚

問到有否打算結婚？盈盈笑言未有計劃。再問為何不公開承認情侶關係？她甜笑說：「我哋冇唔認，亦冇去認，大家鍾意點諗就點諗囉！」近期盈盈常演母親角色，她坦言並不介意：「都係一個角色嚟啫！我呢個年齡嘅人，都有晒仔女啦。我都鍾意小朋友，不過我唔想有小朋友住，亦唔想因為年齡問題而去做。一個小生命嚟到，就會有好大改變。」

湯盈盈與錢嘉樂關係要好，但就是不肯公開戀情。（資料圖片）	湯盈盈今年聖誕節要跟婆婆慶祝。	停牌期間，湯盈盈與黃德斌拍攝駕車戲，她強調當時是用拖車。

盈盈透露聖誕節會放假，不過父母去旅行，故她要與婆婆一起歡度聖誕。她謂：「之前我都問過洪天明聖誕有冇party，我話帶埋婆婆嚟，佢即刻話唔受我玩，所以今年聖誕都唔會出外。」

強調不再犯錯

此外，早前有指盈盈拍《天》劇時，涉嫌停牌期間拍駕駛戲。盈盈坦言不擔心：「我自己一定唔會咁搏囉！外間唔信都冇辦法！之前我的確係有錯，但唔會再犯錯，否則就好衰女。」

化妝：Phoebe Yung

髮型：Jason@Xenter

服裝：Karen Millen

場地：LA CUCINA ITALIANA（QRE Plaza）

文：影視組　攝：劉智源