郭羨妮唔畀仔女早拍拖

細個嗰陣，個個都話要移民，咁啱我又考入加拿大大學，不過要我一個人隻身過去先，對我嚟講真係一種鍛煉，喺嗰邊我一個朋友都冇，冇宿舍住，要住town house。後來爸爸喺嗰邊買咗屋，冇嘢做我就晚晚揸車去超級市場睇嘢，睇到天光，跟住又買啲嘢返屋企整嘢食。

入廚食肥自己

我曾經因為咁而肥到有130幾磅，完全失控，一個人去買麵粉焗muffin，焗完就自己食晒，一個人可以食八個橙，真係好似有病咁，呢個情況維持咗幾個月，屋企人先一齊移民過嚟。之後我都識咗啲朋友仔，嗰陣讀女校，喺啲join school function入面，我識咗一個男仔，嗰陣我18歲，亦都係初戀，佢都係香港人，不過之後因為佢要去美國讀書，所以分開咗。依家睇番轉頭，讀書時真係唔好拍拖，對學業真係有好大影響，我將來都唔會畀啲仔女咁早拍拖。

求醫撫平心理

跟住同第二個男仔拍拖，點知佢話畀我知有第二個，要同我分手，嗰次我好傷心，唔肯食嘢，成日匿埋喊，更由130磅瘦到只有100磅，好唔健康，跟住啲成績又差，考試仲肥咗兩科添！我好記得當時我要去睇心理醫生，後來得到屋企人嘅關懷、鼓勵，先至熬過嗰段日子，嗰陣時太細，乜都唔識，覺得失戀就係世界末日咁。

後記

不知不覺，Sonija已加入娛樂圈十多年，還記得當時她選港姐，是最「標青」的一位，樣子甜美、笑容可親，當年她入行的第一個專訪，都是小記操刀。如今Sonija已事業有成，結了婚兼快成為人母，雖然側邊所有的都已改變，但她的性格、容貌都沒多變，拍攝當日，攝影師還讚她比之前漂亮，那時大家還不知她已「有喜」，不過一個懷孕女性，的確會有其獨特的「美」呢！

口述：郭羨妮 筆錄：影視組