陳茵媺先禮後兵箍實陳豪
陳豪、林保怡及黃德斌昨晚宣傳新劇《天與地》，並組成「Sober Band」獻唱，期間保怡high爆打斷鼓棍。雖然新劇收視低迷，但陳豪力撐口碑好，更自爆獲的士司機激讚，而女友陳茵媺亦已「蜜蜜」選購聖誕禮物呵番，並安排弟弟來港審查「準姊夫」！
劇集《天與地》演員陳豪、林保怡及黃德斌等，昨晚在中環一間餐廳宣布由三子組成的「Sober Band」正式成立，期間保怡high爆打斷鼓棍，又戲謔隊名應叫「掃帚Band」。各有各忙的他們雖然只綵排數天，但靠「天才波」的演出仍相當「啱聽」。對於新劇收視屢創新低，三子齊讚結局篇精彩兼感人，定能刺激收視，陳豪說：「套劇帶來兩個意外，一係收視唔好，二係口碑咁好，連的士司機都同我講話好好睇，真係大平反！」
保怡續寸無綫
至於保怡繼續「寸寸貢」：「其實《天》劇咁多宣傳應該要多謝TVB，其實套劇擺咗兩年大可以唔播，吹咩？但公司都播就要多謝！」德斌就笑言劇集能一圓其歌手夢，劇集歌曲更打入電台流行榜。監製戚其義表示沒聽聞劇集因收視低迷而要腰斬，對於《天》劇被指拖低其他時段節目的收視，他愕然地說：「吓？掉番轉咁講，呢條數真係唔識計！」並強調《天》劇是歷年來最滿意及最花心血的作品。
否認遭「拋棄」
此外，陳豪女友陳茵媺昨日出席另一活動時，自爆未買聖誕禮物給男友陳豪：「要搵啲啱佢用嘅！（搵個老婆咪啱用囉！）哈哈！唔使啦！」她透露弟弟將由加拿大來港過節，亦會與「準姊夫」陳豪見面。對於被拍得遭陳豪在街頭「拋棄」，她即為男友解圍：「我哋嗰日出去食法國餐，之後大家各有各開工先分頭走，佢冇丟低我！」
文：影視組