徐子珊飛吳卓羲避嫌換畫
徐子珊、張馨予因吳卓羲（Ron）變成「情敵」，有指正印馨予不滿子珊與Ron傳緋聞，致電鬧爆子珊並以蕩娃來形容她，兩女勢成水火！前晚子珊在首映禮中否認接到馨予來電，指事件如連續劇般沒完沒了，望可轉換另一談論對象，至於馨予則於昨日離港。
前晚新片《Laughing Gor之潛罪犯》首映，演員徐子珊、吳鎮宇、謝天華、黃宗澤、文詠珊（JM）、林峯等到場，真空透視裝上陣的子珊揮低密實JM，成為全場焦點，子珊自言抵冷貪瀟湘，但已做好安全措施以缽仔糕打底。
「識佢係Ron女友」
對有指被張馨予致電鬧爆，子珊沒好氣說：「個古仔沒完沒了，好似連續劇咁，其實《法證》宣傳完咗，新戲拍檔唔係Ron，係鎮宇、Bosco同天華，呢啲花邊新聞可以轉吓，唔係大家會睇到悶。（咁有冇打嚟鬧你？）當然冇，所有嘢都係胡亂猜測。（佢話唔識你！）但我識佢，佢係Ron女友嘛！新聞係咁講。（仲話你係蕩娃！）我唔係。（咁Ron有冇同你講唔好意思？）冇主動提出，冇所謂，緋聞唔需要特別去講。」
「正印」抱病北飛
而連日在港為寫真集四出取景的馨予，因服飾單薄而冷病了，昨日還發燒，她仍堅持乘夜機赴北京，身體沒大礙的她今天為劇集《岳飛》開工，與黃曉明合作，她則飾演女英雄，並有多場動作及打鼓戲份，期間她會宣傳電影《河東獅吼II》，預計下月再來港。
至於鎮宇對於胡杏兒開到口想他回巢拍新劇《衝上雲霄2》，他指仍在接洽階段，會留檔期給TVB，因他從未試過客串，亦不想破例，他說：「總之傾緊一世長約啦，『母校』手緊，畢業學員咪嘗試捐助，唔好收咁貴囉！其實都幾怕拍續集，驚唔知點演番個角色，但呢次特別啲，好想幫到TVB手。」對於演員各有各忙影片宣傳攻勢少，天華承認宣傳比重會落在網絡上，更期望票房愈多愈好。
文：影視組