郭羨妮心灰：唔知想點
郭羨妮成為港姐冠軍後，不久便被委派拍劇，算是幸運，不過由於她的性格一向慢熱，故很少與工作人員「埋堆」，更聽到不少閒言閒語，令她一時感心淡，她說：「當時唔知自己想點，諗住退出娛圈。」
卸任港姐不久，我就被委派入劇組拍劇，當時第一套拍嘅係《尋秦記》，呢套劇依家喺大陸都好受歡迎，嗰陣其實拍得唔係好開心，因為第一次拍就拍古裝，啲對白又文縐縐，好唔適合自己，不過同劇班前輩好似宣萱、江華、古天樂都好照顧我，我哋要去橫店、蒙古拍外景，可能自己性格慢熱，同啲演員唔熟，好多工作人員、武指事後都問番我，記唔記得嗰陣我成日匿埋一邊，自己畫畫，真係好好笑，依家當然唔會啦，同台前幕後都好傾得埋。
經歷過識處理
嗰陣仲係新人嘅我，一埋位roll機就緊張到抖唔到氣，好大壓力，又驚畀人鬧，都試過聽到唔好嘅說話：「幾點收得工？睇Sonija啦！」聽到呢啲說話當然唔開心，我份人又唔係好識同人溝通，太收埋自己。依家當然唔會理人講乜，如果有人咁講，我會面對面問番佢，將件事化解，不過呢啲都係經歷咗多年先識。
演奸角畀人鬧
不過以前都有心淡嘅時候，我諗住放棄、唔做，試過幾次去報名讀書，當時我係唔知自己想點，係咪自己性格唔適合喺呢行呢？但好奇怪，好似畀好多嘢拉番轉頭咁，所以我一路唔覺自己好順利，都有好辛苦地方。拍完《尋秦記》後，我又拍咗《洛神》、《帝女花》等劇，兩套都係做衰人，之前觀眾唔熟我，但啲角色就入晒佢哋腦，喺街上、上網都有人鬧我，早排《洛神》重播，我都唔敢睇番，個樣好恐怖，我嗰陣同經理人講唔想再做呢啲角色，之後就冇做過奸角，近年拍嗰啲好似《古靈精探》都係開心劇集。