梁朝偉耍太極幫老友解圍
【蔡志豪上海直擊】梁朝偉主演的《一代宗師》，由於「精心雕琢」多年尚未面世；偉仔昨日雖出席另一新戲宣傳活動，被記者笑問《一》片變成《一代「失蹤」（師宗）》，幸好偉仔腦筋急轉彎，詠春變太極，轉移話題自爆拍戲期間辛苦到嘔，實行力撐老友王家衛。
美亞電影投資的新戲《聽風者》，昨日在上海和平飯店舉行記者會，主要演員梁朝偉、周迅、范曉萱、導演麥兆輝及莊文強等均有出席，吸引半百傳媒採訪。雖然是《聽》片宣傳活動，但話題卻多次落在偉仔主演另一電影《一代宗師》上，麥兆輝與莊文強甫開始已開玩笑說：「一直想搵梁朝偉拍呢部戲，但知道佢拍《一代宗師》好忙，唔敢搵。」席間，傳媒質疑《聽》片進度慢，隨即有人笑指偉仔「再慢的戲也拍過」，矛頭直接《一代宗師》，又玩國語諧音將戲名改為《一代「失蹤」（師宗）》，嚇得偉仔一度發呆，惟有扯開話題指最重要拍出好戲。之後，大會展示新戲海報時，偉仔發揮搞笑本色指拍攝期間因身體不適，吐了四次，連喝水也有困難，可惜「沒人性」的導演還是要他繼續拍下去。
演戲唔慣冇眼神
雖然偉仔已不是首次演盲人，但仍表示今次再演有難度：「做呢啲角色睇到又要扮睇唔到，平時我會用眼神做戲，無咗眼神有啲唔慣，初時會諗點算，又周圍問人似唔似，有時仲會忘記咗自己係盲。」就連拍檔周迅，亦笑言經常忘記偉仔是「盲人」：「有場戲要拖住佢係咁跑，但又唔醒起佢盲喎。」偉仔則不忘打趣謂：「有時明明見到就撞埋棵樹，都唔知避唔避好。」
讚嘉玲周迅都好
此時，有傳媒追問他周迅與劉嘉玲哪位演技較好？再被嚇呆的偉仔靜思數秒後說：「兩個都很好。」另《聽》片前晚筵開二十多席慶祝關機，除導演麥、莊外，偉仔及美亞老闆李國興亦有出席，更一齊上台祝酒。
文：影視組