郭羨妮信姻緣天賜踏實老公

以前一直以來都唔知自己要求嘅另一半係點，所以一直等緊一個適合嘅人出現。做娛樂圈呢一行，好似唔容許有拍拖呢回事咁，忙緊嘅時候，就冇時間拍拖，亦好難遇到一個適合自己嘅人，之前不停開劇，就唔會識到現實中、心目中嘅人選。其實我要嘅只係好簡單，好似我老公咁就得，佢份人好實在，腳踏實地，又畀到安全感我，唔會令我好擔驚受怕。

拍拖五指可數

如果問我感情上係咪疑心大嘅人，其實呢樣嘢好睇對方，同年紀都有關係，不過我覺得咁大個人，要對自己有信心，亦要同時畀到對方信心，呢樣嘢係雙方嘅！我唔係一個容易愛上人嘅女人，正式拍拖都唔係好多次，真正拍拖連五隻手指都數得晒！之前我都曾經諗過放棄，一個人咪一個人囉！好過求其搵一個，姻緣天注定，無喇喇又會出現一個畀我。

做空姐時我都同一個空中少爺拍拖，佢又係一個好實在嘅人，都幾靚仔o架！嗰陣大家同事，好自然就喺埋一齊，我諗如果我冇選港姐，可能我已經嫁咗畀佢都未定。我哋拍咗拖幾年，選港姐時都喺一齊，之後因為覺得大家好似兩個世界嘅人，半年後就分手，嗰次分手係我提出嘅，嗰陣大家都好年輕，佢質素唔差，好多女仔鍾意佢，我覺得好似拖住佢咁，所以提出分手，依家佢已經結咗婚，生咗小朋友。嗰陣時我嘅事業啱啱開始，入行時事業心一定有，佢又同我講諗住幾耐就結婚，大家都有壓力，咁不如分開啦！

口述：郭羨妮 筆錄：影視組