薛凱琪（Fiona）近月陪方大同周圍飛做巡唱嘉賓，據知兩人日對夜對感情邁進一大步，本報在幕後工作人員的facebook發現兩人秘遊蜜照，齊齊擺情侶甫士大晒甜蜜，「大凱戀」感情升溫。
方大同近月忙於在大陸、台灣等地舉行演唱會，不避嫌請了緋聞女友Fiona做嘉賓，兩人台上台下都表現合拍，連粉絲都十分受落兩人的情侶檔演出，不過，「大凱戀」一直不認拍拖，以好朋友身份作為掩飾；惟本報在幕後工作人員的facebook，發現了一輯兩人外遊的相片，Fiona笑得十分燦爛，還跟大同齊齊擺出單手托腮的情侶甫士，羨煞旁人。
據知，Fiona幫大同做了三站巡唱嘉賓，每站方媽媽都隨行，方媽媽對Fiona十分愛錫，在上海一站時更介紹親友給Fiona認識，恍如當她是「新抱仔」般對待，相處有如一家人般親密，而大同亦對Fiona十分體貼，處處表現出男士應有風度，令她甜在心頭。
本報向Fiona求證，她表示相片是早前跟大同去上海巡唱時，抽空遊覽藝術館拍攝的。問兩人感情是否邁進一步？她笑說：「我哋識咗6年，唔會幾日突飛猛進，男女朋友要經過好多患難增進感情，不過自己好耐冇去旅行，今次玩得好開心。」
問到方媽媽是否視她如「未來新抱仔」？Fiona說：「唔可以咁講，佢係auntie，佢對每個人都好照顧，帶大家周圍食嘢，自己都肥咗幾磅。（大同對你好細心？）佢係我認識嘅男仔中最細心，出街凍會叫我帶多件衫，又提我小心過馬路，但目前我哋只係好朋友。」
文：音樂組