BOYZ合體搵銀無懼Dry爆過節
重組後的BOYZ今年工作不斷，關智斌（Kenny）和張致恒（Steven）為答謝同事，會買禮物及炮製聖誕曲奇慰勞他們；另外，兩個男生雖狂呻要Dry爆過聖誕，但合體搵銀已勝過一切﹗
BOYZ今年合體重新出發，成績不俗，更入選「叱咤我最喜愛的組合」最後五強，兩人表示這已是最好的「聖誕禮物」。日前Kenny和Steven帶備聖誕裝飾返公司布置，問到今年聖誕如何度過？Steven說：「今年重組後，好多廣告客戶搵我哋做嘢，亦唱咗好多騷，我寧願聖誕冇假放，搵錢至上，節日對我哋嚟講，只係工作開始。」
買Lotion滋潤
Kenny亦說：「我哋拍住上，冇假放冇所謂，趁住呢個黃金檔期多啲嘢做仲好。」為答謝同事，BOYZ表示要好好慰勞他們，Kenny說：「班同事好幫手，買啲小禮物畀佢哋。」Steven亦說：「我諗住整聖誕曲奇，再唔係叫一個大薄餅一齊食﹗」
至於是否繼續Dry爆過聖誕？兩人笑稱不介意，Steven說：「節日冇拍拖唔一定Dry，有耶穌嘛，呢啲（指感情事）等主安排。」Kenny則大搞爛Gag：「聖誕節梗係Dry啦，天氣乾燥，買多啲Lotion咪可以滋潤囉。」
談及最難忘聖誕節，Kenny說：「最難忘有一年喺加拿大讀書，第一次見到雪，好浪漫，氣氛超好，當地人要用一個月時間迎接聖誕節，好重視呢個佳節。」Steven則說：「有一年試過踢拖同朋友去尖東睇燈飾，但因為人太多，結果畀人踩爆腳趾公。」