薛凱琪緣分天定等Mr. Right
薛凱琪（Fiona）跟緋聞男友方大同把臂同遊上海，她視大同為知己好友，無懼緋聞嚇走追求者，因為她深信緣分上天自有安排，真命天子來臨，要擋也擋不住，她笑言有耐性慢慢等「他」出現。
Fiona早前到上海為大同演唱會做嘉賓，完騷後兩人跟同事因利乘便留多幾日暢遊，她說：「我成三年冇去過旅行，平日各有各忙，難得今次跟大同、同事可以寓工作於娛樂，咪留低玩幾日，大同帶我去咗一間素食餐館食飯，又帶我去佢朋友屋企食住家飯，真係好好味，喺上海六日就肥咗幾磅啦。」
大同係知己
記者取笑兩人拍拖旅遊，Fiona笑說：「梗係唔係，喺呢個圈好難搵到朋友，喺舞台上有大同呢個知己咁有默契，我唔會在意緋聞，如果因為咁去避忌即係輸咗畀新聞，藝人都要有自己生活，冇理由畀呢啲新聞影響。」
她亦沒想過以情侶檔搵銀，Fiona說：「我唔想利用一啲新聞去搵錢，想啲粉絲、觀眾真係想睇我戲、聽我歌。」
耐性等好嘢
可擔心緋聞會嚇走追求者？Fiona一點也不擔心：「好老土咁講，我相信緣分上天自有安排，如果真命天子出現，點嚇都嚇唔走，擋都擋唔住！」她笑言細個就怕「dry」，但大個了就冇有怕：「搵個唔啱嘅一齊咪仲寂寞，我唔會怕寂寞而亂拍拖。（畀人話剩女。）我唔介意啲人點講，等到Mr. Right，一世都好開心嗰個係我，唔應該驚群眾壓力去搵男友，好嘢係要等吓，我好有耐性o架！」
文：音樂組