曹敏莉親手湊B極速修身
剛為人母不久的「慧妍雅集」副會長曹敏莉，除忙於湊B女外，更積極行善，近期忙於籌備明年「慧妍雅集」三十周年的慶祝活動。曹敏莉產後不假手於人，落手落腳湊BB，身材迅速回復苗條的她笑謂：「湊BB消耗好大，係最好嘅減肥方法。」
曹敏莉第二年擔任「慧妍雅集」副會長，除了忙於籌備在2月舉行，一年一度的慈善籌步行籌款活動《昂步健康行212愛一愛》外，明年是「慧妍雅集」三十周年，5月將在君悅酒店舉行大型慈善晚宴，她說：「慈善步行如果天氣好都會帶埋個女去，全家人一齊支持。」
仍投入慈善工作
曹敏莉既要忙湊BB又要忙會務，可會感吃力﹖她說：「唔會，參與慧妍之後去探訪，更加要珍惜自己所擁有嘅，幫到人比自己享受更開心。大家亦好體諒我有時要湊BB唔能夠開會，特別係好敬佩王愛倫和陳紫蓮（港姐之母），佢哋積極投入做善事嘅愛心，唔係佢哋帶頭，我都未必會咁投入。」
剛為人母的曹敏莉產後迅速修身，距離理想磅數只差5磅，她說：「依家可以着番以前啲衫，希望再減5至8磅，都冇特別做運動去減，只係均衡飲食，其實自己落手落腳去湊BB已經係最好嘅減肥方法，消耗好大。」
拒錯過女兒成長
回復苗條身材的曹敏莉，卻不再積極投入幕前演出：「睇住BB大得好快，5個月大已經着緊一歲嘅衫，實在唔想錯過佢任何嘅成長時間，自己都好享受湊BB嘅過程，暫時以家庭為先，要時間配合到同埋有好劇本先考慮，暫時未放得低囡囡呢。」
採訪：影視組
攝影：沈健程
場地：EL CID 西班牙餐廳