阿佘遇好劇本易過好男人

阿佘與無綫現時以部頭形式合作拍劇集，兩年前拍畢的《天與地》終於播出，不過播映至今，此劇一直被指不受重視，更有傳主角林保怡與她因為不與無綫簽經理人合約，令此劇遲遲不能播映，最後安排在今年台慶後才得以「重見天日」。

自己未顧掂唔諗生仔

問到對此安排會否感失望？阿佘說：「我唔知係咪呢啲原因而令呢套劇遲播，我亦唔會去理會呢啲嘢！作為演員可以過足戲癮，拍時開心，又可以試到唔同類型嘅角色，已好滿足。依家咁嘅角色真係可遇不可求的，遇到咁嘅編劇係好好彩嘅事。呢套劇每一個角色都背負太多，拍時好沉重。我記得拍之前我放假返夏威夷，我一路幻想，為自己角色寫自傳，嗰個月放假係唔開心，因為自己要鑽入去角色度。呢套劇係好有感覺，拍時難度都好高。」

佘詩曼現專心工作，感情隨緣。

阿佘慶幸可與林保怡（左）及黃德斌合作《天與地》。

提到近期不少圈中人結婚生仔，阿佘笑言：「遇好劇本仲容易過遇到好男人！（唔想早啲生小朋友？）暫時唔會諗呢樣嘢，自己都未搞掂自己，照顧自己都好吃力。」

怕與陌生對手難溝通

另外，《天》劇監製戚其義明年會開拍《金枝慾孽》第二輯，問她會否接拍？阿佘說：「傾啦！我自己意願當然想拍。但因為我之前都應承咗第二個投資商拍第二個劇，都要尊重番人哋，要再傾。」問是否離開無綫有更好發展？她坦言：「我不嬲覺得出面世界好大、好美好。對自己嚟講，有新衝擊先會有團火，起碼出到去成個班底未合作過，對自己嚟講有新鮮感。初時都有擔心唔適應，怕同外面演員溝通唔到，不過依家暫時都合作好愉快。」

攝：李廣成　文：影視組