杏兒標青多仔追

讀到中二我就去咗北愛爾蘭留學，因為爸爸係公務員，親屬去英國嘅地方讀書會有資助，而爸爸就選咗一個物價較低嘅地方畀我去，身邊朋友覺得好怪，會揀呢個唔太熱門嘅地方留學，一般會揀倫敦呀……不過都好，如果畀我去倫敦可能容易學壞。

曾受種族歧視

好感恩爸爸供我去讀書，令我識多國語言，又學識獨立，令到我有危機主義，冇公主病。我記得當年我喺嗰邊讀書好慳，半年使費都係二千二百英鎊。有次返港，我攞咗好多行李，為咗慳錢，我將所有嘅行李自己攞上公車，唔搭的士，又好彩上飛機冇charge我超重要畀過磅費，依家諗番都覺得自己好叻，可能有過咁樣嘅經歷，所以培養咗我依家努力賺錢嘅性格。

讀書時最開心最carefree，我13歲就過去，讀咗六年，曾被種族歧視，試過畀班鬼仔擲石仔，街頭成日教派衝突，半夜又有擲炸彈……我好驚問使唔使走，但班同學覺得冇嘢，我哋咪繼續瞓！除咗歧視，初時唔識英文好辛苦，上堂唔識聽，成績全部唔合格，只係數學叻（因為數學唔使識英文），所以好有挫敗感，仲要畀人覺得好蠢！

再見亦是朋友

到習慣咗嗰邊生活，總算享受到一般少男少女嘅校園生活，因為嗰邊華人面孔唔多，而我都算班中標青嗰個，所以都多男仔追，不過，我哋嗰個年代拍拖好單純，唔鍾意就直接拒絕，禮物都唔會收，所以，男仔追求招式唔會太激烈，都係送吓公仔、花咁啦！

當年我都有拍吓拖，男友仔係香港人，之前喺倫敦讀書，我哋相隔兩個城巿，都會傾電話，keep咗兩年幾，直至依家我哋仲有聯絡，生日時佢都有祝我生日快樂，對方雖然仲未結婚，但我哋都只係純真嘅友情關係，唔開心都會搵佢傾訴，見面就冇乜機會，因為我都忙。

口述：胡杏兒　筆錄：影視組