嘉穎風騷 有意明年買樓撩阿佘復合
鄭嘉穎被指與佘詩曼翻撻兩個月，更承諾買樓增加「女友」安全感。嘉穎昨日否認復合，但承認明年有意買樓做業主，對於外界一直希望「佘穎」復合，嘉穎風騷地笑說：「咁我同佢提議吓。」明顯「佘」情未了！
三料視帝鄭嘉穎除了事業運強勁，密密吸金外，最近有傳與視后舊愛佘詩曼翻撻兩個月，男方更一改「軟皮蛇」性格，承諾買樓箍「佘」。「佘穎」於07年底合作《法證先鋒II》擦出愛火，及至08年因八號風球而爆發「屈佘」事件，但最終於09年因性格不合分手。
上年買樓畀阿媽
昨日嘉穎與胡杏兒在電視城繼續趕拍《怒火街頭2》，鑑於劇情影射馬頭圍道冧樓事件，二人均以污糟邋遢的造型示人。有記者上前恭喜「佘穎」復合，嘉穎說：「唔係，係先恭喜我，我哋只係朋友，多謝關心。」對於被指買樓箍「佘」？他再度否認：「咁佢哋就冇查清楚，層樓係上年買畀阿媽投資嘅。」目前仍是「冇殼蝸牛」的他，不諱言明年計劃置業，對於外界認為「佘穎」襯到絕，理應破鏡重圓，他笑容滿面說：「咁我同佢提議吓，講笑咋！總之多謝晒，但呢一刻係零。」
杏兒嘆佳節離港
杏兒則透露已拍竣《怒》劇的戲份，稍後將赴內地拍劇賺人仔：「之後幾個月我都唔喺香港，聖誕、農曆新年同情人節都冇得喺香港過。（會唔會叫男友黃宗澤北上慰藉？）做嘢先啦！隨緣。（呢排好恩愛？）唔係。（計劃結婚？）做嘢先啦。」談到榮膺雙料視后有否加劇酬？她說：「套劇一早接咗，酬勞都OK。講真唔會加太多，費事冇人搵我啦！」
文：影視組