克勤破冰返娘家：心情複雜
「無綫契仔」李克勤因四大唱片版稅風波，禁足無綫兩年，昨晚終於「回家」為「東華」獻唱籌款，克勤坦言心情複雜。
環球歌手李克勤在無綫「蒸發」兩年後，昨晚終於為《歡樂滿東華2011》獻唱，無綫節目《東張西望》欲搶先訪問他，但克勤體恤報章截稿需要，先做文字記者訪問，他說：「返到嚟，心情複雜，見番老友、好兄弟，即時影相上微博。作為返嚟第一步，呢個係好timing，善長捐錢，我做慈善，揀唱《孔明燈》，係表達我離開TVB以來嘅感覺。」
做《勁歌》頒獎嘉賓
克勤又表示昨晚特准囝囝晚一點才睡，他說：「我個仔成日話想喺電視上睇我，我特准佢今晚夜啲瞓。（誓搶回契仔位？）時代唔同，樂易玲話會畀合約歌手優先，好明嘅，互相配合，有啱嘅會做。」克勤又感謝志雲斡旋有功，他說：「佢有出力，好多人錫我，促成件事，我SMS佢，講笑問『做乜我返，你就走？』（同佢farewell？）早餐聚會照繼續。（冇得角逐《勁歌》？）好似請我頒獎，等公司傾，文字嘢好複雜，TVB睇住我大，我好樂意返嚟。」
克勤下午與久別重逢的無綫幕後人員合照上載到微博，並留言「一班TVB幕後兄弟又見了」，相中克勤笑到見牙不見眼，興奮之情溢於言表。
超蓮低胸下廚籌款
而賭王千金何超蓮以低胸短裙出席，她說：「條裙英國買，萬幾蚊，我返嚟過聖誕，估唔到咁凍，希望攝記唔好再企高影我，我同媽咪（三太）煮嘢食籌款，爹哋喺屋企支持。」
此外，同為環球歌手的張敬軒及吳雨霏卻為亞視《感動香港年度人物頒獎禮》做嘉賓，軒仔說：「我冇仔細睇合約，只知日後我可亮相各台。（想上無綫？）合約要時間訂定，指日可待。」文：影視組