蔚雨芯靠幻想滿足愛慾

16歲學生o靚模謝芷蕙被指在一個生日會上連o靚沈志明及王浩信,當晚主角正是狄易達師妹蔚雨芯(Rainky)!Rainky覺得16歲拍拖實在太早,現年18歲的她選擇暫時禁愛,只幻想與劇集型男談情。

狄易達師妹Rainky將進軍樂壇,首隻主打歌即大膽翻唱「校長」譚詠麟的經典金曲《愛在深秋》,她直言壓力甚大:「細細個媽咪就不停播校長嘅歌,今次重新填詞,希望有唔同感覺!」日前校長在微博給予意見,讚她低音部分出色。

讚Cammi乖女

提到16歲學生o靚模謝芷蕙(Cammi)早前在其生日會上認識「萬寧哥哥」沈志明及王浩信,鬧出滿城風雨,Rainky對於「主角變配角」亦感無奈,她表示與Cammi不算熟落,印象中對方是單純乖乖女,想不到如此犀利。對於Cammi戀愛大過天,年僅18歲的Rainky則不認同:「依家係搏殺期,冇諗拍拖,起碼過多兩年先!(覺得佢博上位?)每個人價值觀唔同,但我唔想做破壞形象嘅事。」感情生活Dry爆,Rainky惟有煲劇幻想與型男談情,以滿足談戀愛的慾念:「鍾意睇台劇同韓劇,會當自己係女主角,拎啲感受再投放喺音樂度!」

拒刻意騷胸

而今年中Rainky曾參選港姐,雖然沒有入圍,但她直言經驗受用不淺,對於當時被稱為「闊面周秀娜」,Rainky不覺得兩人似樣,但開心予人性感的感覺,問到可否如娜姐般騷胸?同屬有料之人的Rainky直言滿意身材,但視之為秘密武器,不會隨意「出籠」:「都係配合歌曲,唔會無喇喇着泳衣出嚟!」

Profile

蔚雨芯(Rainky)

年齡 :18歲

身高 :1米67

體重 :48kg

三圍 :32D、24、35

入行經過 :13歲開始做模特兒,參加校花校草選舉時被現在經理人簽約,至今年正式出道闖樂壇,首隻主打歌是翻唱譚詠麟的《愛在深秋》。

採訪:立影 攝影:秦健輝

場地:Vocal Stage