馬賽踩8吋red妹催旺
最近劇接劇的無綫小花馬賽，首度入圍無綫台慶頒獎禮的「飛躍進步女藝員」，與高海寧、樂瞳、龔嘉欣及黃智雯一較高下！為了一擊即中，馬賽日前相約好友兼神級時裝達人張學潤（Nelson)到中環挑選戰衣，備戰下月5日舉行的頒獎禮。除了借助好友的「神之手」外，她又專攻桃紅色及鮮紅色晚裝，化身red妹催旺！
寫定得獎謝辭
身形嬌小的馬賽，深明難靠big爆咪咪突圍，惟有出招「增高」，於是聽從Nelson（NelNel）意見物色八吋高跟鞋變「高妹」，更挑戰「不可能的任務」—穿長裙：「雖然我冇刻意追求『事業線』，但性感都冇所謂，最緊要高貴同靚！」在tvb網上投票穩佔第一位的她，已擬定致謝辭：「入行以嚟知道邊個幫過我，好似NelNel咁，就算冇獎攞都要請食飯啦！（勁敵？）黃智雯，佢好多劇拍，我哋私底下成日都鬥夜瞓！哈哈！」
此外，據知無綫已邀請林家棟、泰迪羅賓及溫碧霞等任頒獎嘉賓，司儀則由「鐵膽」鄭裕玲及「新鮮人」王浩信負責。至於備受矚目的「萬千光輝演藝大獎」，據知落在李香琴手上，而非早前有傳的汪明荃。
文：影視組
攝：黃叔榮
場地：ARTHUR LAM