37歲千嬅佗B兩個月

千嬅和丁子高於○九年秘婚後，兩公婆都想生愛情結晶品，尤其丁子高更是恨到發燒，甚至走去驗精，搜羅各種造人體位，又要千嬅戒冷飲和戒着高踭鞋。據知，數月前千嬅搵專睇生仔的中醫周書正調理身體，丁氏夫婦經過一番努力，終成功造人。千嬅現時懷有兩個月身孕，基於中國人傳統觀念怕胎兒小器，未能公布喜訊。昨日本報致電千嬅求證懷孕消息，至截稿前未回覆。丁子高則透過短訊回覆：「未知！暫時沒回應。多謝大家關心！」

避跳勁舞

消息指千嬅懷孕後好緊張，出入都要人陪伴護駕。本報連日追訪，約兩星期前千嬅現身銅鑼灣便由助手相陪，她見到記者表現愕然，還下意識用手遮肚。雖然當日氣溫有廿幾度，但千嬅卻戴上大頸巾，平時跳跳紮的她亦慢行上車，還跟記者說：「唔使急，慢慢。」上周四，千嬅離家往髮型屋整頭，沿途都由助手扶實，明顯為胎兒做足安全措施。

丁子高前晚與母親欣賞個唱，獲千嬅大讚是好老公。	穿孕婦裝的千嬅赤腳演出，為穩陣棄穿高踭鞋。	11月11日 千嬅到銅鑼灣行街時發現記者，即時用手掩肚。

不過，大肚卻打亂了千嬅的計劃，事關她本想完成五場「Minor Classics Live」演唱會後才全力造人，怎知BB提早報到，被迫臨時改造另一批大肚裙做戰衣。前晚千嬅在尾場騷穿了大肚裙赤腳演唱，避跳勁舞，最多只是手fing fing，又不停用手摸肚，換上另一襲燈籠款戰衣時，臀部與雙腿亦渾圓，孕味甚濃。尾聲時她眼濕濕向台下的老公示愛，多謝對方送上歡樂並接受她的負能量脾氣。

臨時改衫

完騷後千嬅受訪，對於穿大肚裙上台，她說：「原先準備批衫有意外，呢批係五日前搵Tomas救命先有。」問經常摸肚是否有喜？她說：「哈哈，未得，得就一定講，我都好傳統怕小器，怕愈講愈唔得，好驚！所以首先要搞掂工作壓力，冇唔好情緒。」她又稱完騷後收爐，放埋農曆新年假。問是否不出席頒獎禮？她說：「未必得，去到一定去，睇吓到時環境啦！」

文：音樂組

攝：追蹤組