鄭嘉穎：抵杏兒攞視后
鄭嘉穎、李璨琛和林子善在《怒火街頭》的「怒火三兄弟」與演技「升呢」的胡杏兒齊齊擦出火花，令劇集叫好叫座。鄭嘉穎更讚杏兒演技提升，能互相搓波演戲，力撐視后：「今年應該畀杏兒」。
同胡杏兒第一次合作係《舞動奇跡》參加跳舞比賽，之後合作《烈火雄心III》，當時都未擦出火花，去到《怒火街頭》真係覺得杏兒係去到某個程度嘅演員嚟。我覺得佢到《怒火街頭》時，你畀啲咩佢，佢即刻反應到，好多時我哋唔係跟劇本，彈個波畀佢，佢可以打番轉頭喎，咁就好玩，大家可以「搓來搓去」咁就得喇。
依家喺TVB多產嘅女藝人，我覺得楊怡同胡杏兒可以做到呢樣嘢。「視后」佢絕對係今年嘅大熱，唔係因為同佢拍《怒火街頭》，係因為覺得佢係一個值得攞嘅演員，所以今年應該畀佢，唔止我覺得係，大部分人都覺得係，佢攞係一個好正常嘅賽果。
開心性格大兜亂
《怒火街頭》爛撻撻的Law霸，我諗大家平時都冇乜可能見到；林子善之前拍《鐵馬尋橋》已經識，平時爆慣、黑社會feel的子善就見得多，但咁有教養就好少見；李璨琛平時都好爆，但裏面就做一個正義凜然嘅社工，角色將我哋嘅性格完全顛倒晒。
《怒火街頭》係咁多年以嚟其中一套拍得最開心嘅劇，大家相處得好開心，唔係李璨琛都唔會再拍續集啦。開工嘅氣氛好好，拍嘢嘅時候亦好輕鬆，但當拍認真戲嘅時候，大家會好支持大家，好似子善拍一場法庭戲，佢要做一個由唔叻嘅律師變成一個好叻嘅律師，我都會好緊張，都特登入廠幫佢睇住，李璨琛就好有經驗，可以好放心。
口述：鄭嘉穎 筆錄：影視組
文：影視組