馬德鐘陳浩民恩愛慰妻

本身在橫店開工的馬德鐘，昨日突然秘密返港，約下午5時，一身黑衫打扮的馬德鐘與老婆張筱蘭現身中環街頭等的士，當發現記者拍照時，他顯得有點愕然，直至的士駛至，即急急為老婆開車門，盡顯紳士風度，車子當時往上環方向駛。事後馬德鐘接受本報電話訪問表示：「因為今日老婆生日，所以特登返嚟陪老婆食飯，聽日就返去。」他透露去過律師行，跟律師商討如何控告近日的不實報道。再問會否搵冼師傅和樂小姐食飯，他說：「我只係想開開心心陪老婆食飯，其他唔想答。」

BB要遊迪士尼

而昨上午11時半，陳浩民駕車載住老婆往銅鑼灣一酒店接外父外母直駛迪士尼樂園。期間他們於小鎮大街一間餐廳食飯，浩民還請現場十多名記者一起開餐。醫肚後，浩民拖住老婆蔣麗莎到商店閒逛，買了兩頂米奇老鼠帽及頸鏈，並即場戴上，之後又跟主題公仔拍照留念。期間有女粉絲認出浩民，邀影合照，浩民全程雙手垂直未敢「好客」。

馬德鐘與太太密密傾。	腹大便便的麗莎翹住陳浩民到樂園遊玩，非常恩愛。	陳浩民與太太見到小朋友即撩他們玩。

對於一直有傳太太原定今日生B，浩民否認傳言說：「因為BB頸部被臍帶纏咗兩個圈，依家等醫生安排。太太預產期12月中。」問到是誰要到迪士尼玩？浩民打趣地說：「BB囉！我尋日問BB去迪士尼好唔好？跟住佢踢咗老婆個肚兩腳，所以就嚟咗呢度。」

陳浩民與老婆換上得意帽子，被記者圍住影相。	午膳時，陳浩民體貼地餵老婆。	陳浩民與太太及外父外母一齊進餐。

一家三口過聖誕

問到太太麗莎心情緊張嗎？她說：「很期待！（有甚麼準備工作？）有呀！先生和媽媽都幫我準備好。我希望聖誕可以一齊過，因為是BB的第一個聖誕節。」此時，浩民繼續摸住太太巨肚說：「盡量啦！希望可以齊齊整整過聖誕。（想事件盡快解決？）當然啦！發生咗咁嘅事大家都唔想！」當提有雜誌再刊登他與馬德鐘在橫店「攬錫」陳嘉桓相片，會否令三方面都不開心？浩民即說：「唔好講呢啲！希望件事快啲解決，不過，我都會時刻反省。（擔心影響演藝事業？）呢啲唔到自己擔心，自己做出咗嘅事自己負責。」對於至今仍未獲冼師傅原諒？他說：「被動待命。」

文、攝：追蹤組