華仔終於有後 45歲朱麗倩懷胎5月
50歲的劉德華終於有後！昨日凌晨華仔在官網宣告吾家「有喜」，暗認45歲的太太朱麗倩成功懷孕，獲賜龍B。據知，高齡的華仔夫婦婚後經過3年努力，憑着愈挫愈強的鬥志下終人工受孕成功，華嫂已懷孕五個月，可喜可賀！
3年前瞞婚呃盡天下人的華仔，到今日將為人父終於有後，依然不肯坦白公開喜訊！連月來已盛傳華嫂朱麗倩大肚，華仔卻一直採取避談態度，甚至上周六在台灣榮升金馬影帝，被追問老婆是否懷孕仍堅持封嘴，直至前晚返港，「隱」無可「隱」的他，終在昨日凌晨1時50分，在「華仔天地」官網撰文暗認老婆有喜：「感謝老天乾爹也一樣疼我，為我喜上添喜，所以現在吾家『有喜』。」雙喜臨門。
着緊老婆請保鏢
歷盡風浪的華仔，竟連老婆大肚的天大喜訊，都選擇玩暗認風格，不肯大方公告天下。其實華嫂自85年參選馬來西亞「新潮小姐」奪季軍後，認識了跟明星足球隊到當地踢波的華仔，自此做了逾20年地下情人，至08年6月23日，兩人在美國秘婚，華仔為怕影響天王事業，隱瞞了全世界，翌年他被揭破瞞婚驚天秘密，被封大話天王受盡唾罵，被迫在官網發表「遲來的坦白」網誌，承認為了依靠醫學方法提高懷孕率，決定在美國結婚。
據知，求子心切的華仔，婚後一直努力造人，可惜3年來都沒有喜訊，兩公婆轉而尋求醫學幫助，搵名醫做人工受孕，又遍尋中醫調理身體，甚至有傳篤信佛教的華仔，去年到台灣把地藏菩薩像帶回家供奉，誠心求子的他們，終於透過人工受孕成功懷有約5個月華B，令華仔夫婦和父母欣慰不已，消息指華仔十分着緊大肚老婆，特別請了保鏢護駕，平時盡量留在家中安胎，靜待華B出世。
家事低調不補充
前晚約9時半，新鮮出爐的金馬影帝華仔凱旋返港，獲大班中女fans接機，問是否第一時間將封帝喜訊告知太太？華仔依然玩低調說：「乖，不要問。（想同邊個分享？）想同大家分享。」估唔到華仔返家後3小時，即在官網暗認快為人父。
昨日查小欣在電台節目說：「真係好恭喜佢，有次我問佢點解咁避忌講家人同太太？不過我都明，可能唔係劉華意思，畢竟佢太太唔係圈中人會好大壓力，尤其老公係劉華，當時佢拍我膊頭，話你明就好。」
查小欣接受本報電話訪問，她表示節目後SMS恭賀華仔有喜，獲他親自回覆「1...0000000000感謝」，而華仔助手向記者表示，華仔一直對家事低調，不會再回應。
文：音樂組