鄭嘉穎：我唔接受換獎

好多傳聞話拍劇換獎、簽約換獎，照我所知係冇呢樣嘢，呢啲只係外面嘅人想增加頒獎禮嘅趣味性，祥仔、雯女佢哋都唔係攞咗獎之後就簽ＴＶＢ啦，結果第二年都係畀佢哋架！第一年你唔簽ＴＶＢ，第二年你仲畀？證明咗係冇換獎呢樣嘢。可能大家會覺得頒獎禮係一個娛樂性嘅遊戲，我就覺得結果都係睇民意嘅，唔可能夾硬畀獎，對嗰個人亦未必係好事呀，所以我覺得都係順應民意。

06年彈出：我冇得揀

如果真係有換獎呢樣嘢，我唔會接受，因為個獎已經冇咗價值，點解我會想攞個獎呢？都係想得到觀眾認同，如果我搵第二樣嘢嚟換呢個獎，我都得唔到人認同啦。我都攞過架啦，我唔係為咗嗰舊嘢（指獎座），係為咗個獎嘅代表性，等於觀眾對我嘅認同，我續約同你換（獎），咪又係冇咗個認同？我唔要換獎，我要你真係畀我！如果真係屬於我，希望你畀我，如果唔屬於我就唔屬於我啦。

事實上06年憑《天幕下的戀人》攞「視帝」係認受性唔夠嘅，但無奈好多嘢我冇得揀，如果嗰次唔係憑一套愛情劇《天幕下的戀人》攞獎，舉個例係之後嘅《與敵同行》，可能啲人嘅聲音又唔會咁大。好老實講《天幕下的戀人》沈朗呢個角色唔係難演，佢嘅難度真係唔高。以觀眾嘅角度去睇，個角色都唔難演嘅，點架？求其畀架？我好明白觀眾嘅心態，但係當年真係冇乜邊部劇或者係邊個角色係特別彈出，形勢唔似今年。公司畀你係咪可以話唔攞呢？唔得架嘛，嗰年就係咁嘅情況下得獎。有邊個唔想得到大家嘅認同呢？唔係做演員咁辛苦為乜！

同行看好：非常開心

今年嘅情況唔同，之前公司記者會公布今年台慶頒獎禮嘅候選名單，小弟喺同事之間嘅「視帝」投票率最高，令我好開心！因為同行都係演戲嘅，所以知道演繹角色嘅難度有幾高，有咩角色難做，有咩角色易做，知道你係咪做得好……所以得到同行認同非常開心，亦非常難得！對我係好大嘅鼓勵，信心愈嚟愈大。信心唔係自己畀自己，係人哋畀我嘅！由網上投票開始票數最多，去到喺街上觀眾嘅支持、畀我嘅反應……有好多人同我講「今年你應該攞」……信心係一路累積返嚟，如果我冇信心，又點對得住支持我嘅人？

你問我點睇謝天華，我知《潛行狙擊》收視口碑都好，但播出嘅時候我唔喺香港，冇親眼睇過，所以畀唔到自己意見。大家做演員好明白大家嘅心態，亦好明白天華好想攞（視帝），雖然立場唔同，希望大家一齊努力啦！

Profile

身高：1米78

生日：1969年8月15日

簡歷：16歲參加《新秀歌唱大賽》後赴海外升學，及至93年才回港出碟，惟因與經理人戴思聰意見不合而流放台灣，一直星途浮沉。其後獲無綫賞識簽約為「親生仔」，擔正多套劇集，06年終憑《天幕下的戀人》初封視帝，今年《怒火街頭》中「Law霸」一角再度爭視帝。

口述：鄭嘉穎

筆錄：影視組

攝影：吳文聰

場地：Hair Corner

服裝：Beauty & Youth United Arrows