杏兒口快快爆黃宗澤「超短」
無綫台慶前晚圓滿結束，一如以往，星級情侶被曾志偉玩殘，胡杏兒在「揀脷」環節中踢爆男友黃宗澤（Bosco）的「短處」，令Bosco急急澄清自己身懷「長物」。而陳豪則踢爆女友陳茵媺因愛郎情切才失落百萬大獎。
一年一度盛事《萬千星輝賀台慶》前晚舉行，雖然邵逸夫（六叔）因瞓覺缺席，但方逸華（六嬸）仍畀面睇足全場，完騷後才由高層樂易玲陪同下離開，回家照顧六叔。
至於台慶趣劇「登登登對獎門人」亦繼續玩寸公仔箱的情侶檔，只得王祖藍及李亞男一對能僥倖逃離「獎門人」曾志偉的魔掌。期間，陳豪要在五名花旦中挑選出哪隻是女友陳茵媺的耳朵，起初竟誤選徐子珊，幸最後撥亂反正，選中女友的靚耳仔。
「最棹忌畀人話短」
其後，徐子珊要在Bosco、謝天華、陳豪、陳展鵬及鄭嘉穎中選出Bosco的舌頭，豈料她竟拉「正印」杏兒落水，令對方一度面燶！
當志偉問到杏兒為何能一揀即中「宗脷」時，她即說：「因為佢條脷好短！」Bosco聞言即扮嬲大叫：「你知唔知男人最棹忌畀人話短……條脷！」令女友尷尬掩面。受訪時，Bosco笑着承認脷短：「啲女人好口疏，成日爆人啲秘密！（騷啲『長處』畀杏兒睇？）放過我啦！（邊樣長？）命長同腳長。（第三隻腳？）我得兩隻腳！哎呀，總之嗰度（指下體）好正常啦！」
陳茵媺對於失落百萬大獎仍笑說：「其實我都唔知玩緊乜！不過幾得意。」問到估陳豪身體哪一部分最叻？她說：「個樣同感覺！我瞇埋眼都feel到佢！」其後再補充男友棚牙最易認：「因為我同佢都有兔仔牙！」
聖誕送大禮補數
陳豪昨日笑指女友沒因他險估錯耳仔而詐型，對於女友失落一百萬大獎，他即「攬罪上身」：「係我叫佢揀4號嗰疊紙卡，因為係我嘅幸福號碼，估唔到累咗佢，惟有聖誕買番份大禮物補數。」另鄧健泓獨得總值超過百萬的獎金獎品，至於抽中二獎的汪明荃全晚心情一般，獲獎後繼續笑容欠奉。
文：影視組