Eason攰爆預告有獎唔拎
樂壇頒獎禮如箭在弦，陳奕迅（Eason）突宣布明年聖誕停工一個月，意味他將缺席2012年度的四個樂壇頒獎禮，亦預計會冇獎拎，一向精力過人的他說：「原來做咗十幾年真係好攰。」跟競爭對手古巨基碰頭，兩人有傾有講，氣氛平和。
Eason、基仔、謝安琪、吳雨霏（Kary）、梁漢文、張智霖等聯同一眾DJ昨晚出席電台慶祝晚會，剛在台北做完演唱會返港的Eason，風塵僕僕先出席同事婚宴觀禮，再趕去電台活動。身為環球歌手的他對四大與無綫破冰，他坦言也掛住TVB，但能否去無綫亮相由公司安排，對四大歌手因與無綫冇約，沒資格參加勁歌頒獎禮，令頒獎禮失色，他說：「唔關我事。」他更宣布明年聖誕節會停工放一個月大假，他說：「做咗十幾年原來會攰，我唔會宣布唔攞獎，但唔去咪冇獎，如果首歌得大家認同，都會戥你冇獎可惜咪得囉。」
C君心情平復
會上Eason跟基仔兩大競爭對手碰頭，兩人有傾有講，合照時Eason還擺出一副寸樣勁搞笑，對Eason無緣爭勁歌獎，古巨基表示出碟非為攞獎，他說：「大家唔使咁緊張，諗多啲開心事吧。」與無綫有約的他感優勢？他強調一直做好本分，他說：「喺無綫幫到手就幫，都想多啲歌手亮相無綫。」被傳搶去謝安琪「環球一姐」位置的Kary，兩人也有偈傾，Kary被讚腳頭好，加盟環球不久四大即與無綫破冰，她說；「踏出第一步係好事。」
組合農夫成員C君與拍拖6年女友情變後首度露面，對婚事撻Q，他自爆有傷心落淚，他說：「心情平復咗，大家已經冇聯絡。」並透露紫微斗數算他明年會再有姻緣。
台北騷淋雨唱
此外，前晚Eason在台北舉行演唱會，雖然一直落着滂沱大雨，但二萬個座位全爆滿，他淋到底衫褲都濕晒，但他愈唱愈興奮。周杰倫人不到禮到，送上的花籃不忘宣傳自己新專輯：「你的演唱會將會是一個『驚嘆號』哇靠超！」Eason即以滿頭「問號」回周董。文：音樂組