自認清醒冇攬錫 陳浩民怕嚇到老婆早產
身在內地的陳浩民昨日對被指攬錫陳嘉桓（Rose）一事，他表現得很錯愕說：「我做過啲乜嘢呀！（女方承認你事後有同佢講唔好意思？）點解要同佢講唔好意思！我哋尋晚係去消夜，現場有老闆、助理喺度，眾目睽睽下我做得乜嘢出嚟？（有冇攬錫？）冇！點會呀？最多咪哄埋佢耳邊講嘢，搭下膊頭，如果咁嘅接觸佢都覺得唔舒服，我咪打電話同佢講唔好意思囉！因為我完全冇心對佢做唔尊敬嘅事！（係咪飲醉酒？）飲少少，但我清醒，我仲揸電單車返屋企！（老婆知道？）唔知，我都好擔心你哋會點寫，因為我老婆就快生，一陣嚇到佢早產！」
至於當晚同場的洪天明，昨日在電話中承認在現場，但卻飲醉了酒不清醒，天明說：「我迷糊印象中，浩民笑問Rose食唔食羊鞭，但Rose覺得好核突好驚，浩民就咬住羊鞭哄埋去要佢食，先至有錯覺係錫佢啫！（有冇見到攬？）係扶嘅動作啫！以我所知浩民真係玩嘅啫！」
馬德鐘身在內地，在電話中表示：「我同佢（Rose）講秘密啫，諗住想整蠱陳浩民，（你有冇攬住咀佢？）冇，哄埋啫。（講咩秘密？）整佢食羊鞭囉。」