貝安琪趕生BB三代同樂

每朝一句我愛你

其實我完全冇諗過要脫離或者要超越媽咪，都唔會因為咁而覺得有壓力。我同佢係兩個完全唔同嘅人。如果有人會將我哋比較，多咗人提，都係一件好事。媽咪做咗娛樂圈咁耐，會講好多過來人嘅經驗畀我知，我都好鍾意問佢嘅意見。不過我哋都有意見分歧嘅時候，但唔會嗌交或者冷戰，反而會一五一十講清楚大家嘅諗法，再分析利弊，會諗吓點做先係對我最好。

帶阿媽去P

不過除咗工作，我私底下同媽咪都好close。我每朝早一起身都會攬住媽咪，同佢講I love you。媽咪好早就結婚生咗我，所以依家仲好後生，我哋就好似朋友咁，成日一齊玩，我又咩都可以同佢講。我成日都帶埋媽咪去朋友嘅party，我最鍾意跳跳吓舞嗰陣，同朋友介紹「By the way, she is my mum！」，我啲朋友個個都會嚇親，哈哈！我都好期待將來同自己嘅仔女一齊玩。

與母親劉香萍情同姊妹的Ankie，常與母親結伴玩樂。	學習瑜伽達十年之久，Ankie輕鬆做出各種高難度動作。	貝安琪對瑜伽有濃厚興趣，甚至出ＤＶＤ推廣瑜伽文化。

老實講，其實我到依家都未結婚，都有啲唔開心！雖然依家拍拖唔會話以結婚為大前提，但自己都好想結婚同生小朋友，因為我都好想同仔女一齊玩，唔想太老先生BB。

Ankie及Terence被拍得於蘭桂坊激吻，但二人否認戀情。	放大圖片	Ankie從小就喜歡畫畫，家中有不少收藏品。

受影響入行

我之所以會加入娛樂圈，都係因為受到媽咪嘅影響。細細個喺德國佢會帶埋我去戲棚，無論台前幕後嘅工作人員都對我好好。媽咪拍緊戲嗰陣，佢哋會同我玩、同我傾偈，又會送嘢食同玩具畀我。通常媽咪每拍一次戲都要三個月至半年左右，大家都好似一家人咁，好開心，令到我有更多憧憬！到我大個咗，真正成為演員，先發現做演員一啲都唔容易。每個角色都有唔同嘅性格同專長，我哋就要喺短時間內學唔同嘅嘢，演活嗰個角色，真係好有挑戰性。

表演欲伴隨成長

其實我由細到大都好有表演欲，BB仔已經喺德國做模特兒，到7歲就成日演舞台劇、音樂劇。畢業後都喺香港同德國拍過幾部電影，好似同梁朝偉合作嘅《傷城》、同古天樂合作嘅《保持通話》、德國電影《Last Chance Love》同《The Chinese Wife》等等。喺香港同外國拍戲真係完全唔一樣，不過我兩邊都好鍾意，學到唔同嘅嘢。我鍾意香港做嘢夠快、夠效率！雖然依家喺香港主要係做模特兒工作，但係我始終都係想拍戲多啲，有機會會努力爭取。

出瑜伽DVD圓夢

我真係好多謝媽咪一直好支持我做自己鍾意做嘅事。好似我好鍾意做瑜伽，每日都會做兩、三個鐘，佢都受到我影響，開始做瑜伽。有一日，我同佢講好想出瑜伽DVD教人做，佢好支持我，仲投資咗200幾萬嚟幫我完成心願！不過要拍隻DVD原來一啲都唔容易，因為我想要大自然做背景，所以我哋一齊去咗好多地方搵景。決定咗地點之後，我哋拍足3日，每日9個鐘！其中1日仲要遇着打風，不過好彩都順利完成。依家一套三集嘅DVD出咗兩集，賣咗幾千隻，雖然仲未回本，但係媽咪都話冇所謂。佢話呢個係長線投資，就算10年後睇番都仲可以跟住做、唔會過時，真係令我覺得好窩心。

激咀尹子維？好平常！

Ankie與男星尹子維（Terence）的緋聞傳足多年，於09年萬聖節更被斷正夜蒲箍頸激咀長達數分鐘！雖然「人贓俱獲」，但二人堅稱只是兄妹關係，並不是情侶，Ankie說：「我同Terence識咗好多年，一直都好好朋友，就算嗰時畀人影到，都冇影響到我哋嘅關係。其實錫吓喺外國都好平常，估唔到會搞到咁大件事。其實我哋兩個都喺外國返嚟，唔會理其他人點講，都唔會避忌。」無論當時二人拍拖與否，Ankie現已有一個圈外男友。但她不願多談戀情：「同佢一齊咗大半年，我哋由細識到大，不過佢係圈外人，所以想低調啲。」果然夠晒細心。

藝術天分爆燈

Ankie除了瑜伽了得，原來還充滿藝術天分！大學修讀Fine Arts的她，家中收藏了很多畫作及雕刻品。她笑言：「我細細個已經好鍾意畫畫，成日都會帶住畫簿同顏色筆出街，一有機會就畫。」人緣甚廣的她，畫作亦得到很多圈中人賞識，導演陳可辛更對她的作品愛不釋手，故她就把該畫送給他留念。她續說：「之後成龍大哥知道咗，問我『點解佢有我冇？』所以我就喺佢生日嗰陣，畫咗張一大個拳頭嘅畫送畀佢做生日禮物，佢收到都好開心。」

口述：貝安琪

筆錄：龔凱欣

攝影：沈健程

場地：Pure Yoga