鎮宇爆黑幕天華內定視帝

吳鎮宇、謝天華、惠英紅，昨日在油塘區空置貨倉拍攝電影《Laughing Gor之潛罪犯》。吳鎮宇大爆「視帝」大熱謝天華邀請他出席下月5日舉行的《萬千星輝頒獎禮2011》，並擔任頒獎嘉賓頒獎給他。

拍無綫劇辛苦

鎮宇笑說：「呢個世界真係有黑幕，內定一早知係你啦，接到通知咪接到通知囉，全世界都知係你攞獎o架啦，呢個世界連嘉賓都有內定。」而謝天華解釋說：「我知佢6日會出席梁家樹個女（梁靖琪）婚禮，咪叫佢5日嚟埋頒獎禮囉。（頒畀你？）可能佢頒女主角呢。」

天華穿上監犯衫拍攝新片。

血糖低的惠英紅，一停機即周圍搵糖食。

問到吳鎮宇是否接拍劇集《衝上雲霄2》，他說：「經理人接觸緊。（傳要求你簽約？）你問番寫嗰個。」談到不少藝人投訴拍無綫劇辛苦，他說：「你喺香港住，出銅鑼灣都預咗空氣污濁、車多。同人打工唔可以去改人哋個制度，我都係喺呢個制度下出嚟。周潤發搭地鐵都預咗有人影合照，我都預咗廠景接外景。」

惠英紅險暈倒

問到有甚麼要求？鎮宇沒好氣說：「我又唔係打長工，無謂搞咁多，冇所謂，預咗唔會放過啲演員。」至於拍《衝2》會否周遊列國？他說：「拍《烈火雄心》會唔會冇火吖？」

影后惠英紅昨日拍攝一場打鬥戲身手非凡，但原來她當時血糖低差點暈倒，她說：「一停機我四圍問人拎糖食，後來發現有盒西餅就即刻拎嚟食。」

文：影視組