熊黛林唔知醜滿足表演欲
熊黛林自認男仔頭性格，唔識怕醜又喜歡表演。長大後為滿足表演欲，不惜放棄學業當模特兒，又遠赴香港發展事業。雖然父母曾經反對，但因她的堅持，最終也獲得家人支持。
我出生喺南京嘅郊區，家中有爸爸媽媽同哥哥，哥哥比我大年半，因為我係屋企細女，所以屋企人向來都好縱我，一家人感情好好。以前我係牛王妹一名，都幾男仔頭，因為爸爸媽媽工作嘅地方好遠，我同哥哥好早放學，返到屋企，就會跟哥哥同佢嘅朋友一齊出去玩，會燒炮仗同爬樹。細個真係唔識怕醜，因為我鍾意跳舞，表演欲好強。
放棄學位
由細到大我都好有自己主見，好似做模特兒，初時屋企人都反對，因為當年我考咗大學，只係讀咗幾個月，就決定唔讀書，要去上海做模特兒，父母梗係唔鍾意，佢哋覺得好多人想讀都無得讀，但我偏偏就放棄呢個機會。不過，佢哋知我性格，最後只係話你唔好後悔就好。
到後來我喺上海做模特兒做得唔錯，但我又決定要去香港闖一闖，父母梗係唔想我嚟香港啦﹗不過佢哋都係一如以往，只要係我堅持嘅，佢哋都會支持，依家算係發展得唔錯，佢哋都覺得我當時無揀錯。
置安樂窩
對我嚟講，家人永遠放喺第一位，一直以嚟都有唔少有關我嘅報道，無論正面或者負面，我嘅底線係唔好寫我屋企人，好多寫我唔好嘅嘢，我已經唔記得咗，唔開心當然有，但過咗去就算，不過，如果有人寫我屋企人，我會好唔鍾意，寫佢哋寫得太過分，我一定唔會忍，會出聲。屋企人當然有睇過關於我嘅報道，當然見到負面嘅新聞，見我畀人寫得咁慘，佢哋梗係唔鍾意同唔開心，但佢哋好好，從來都唔會問我真假。
依家到我賺到錢，當然第一時間，喺南京幫屋企人置業，畀個安樂窩佢哋，不過我唔會話你知置咗幾多物業，哈哈！（其實我都好想喺香港買樓，但係香港樓巿真係太貴，我買唔起。）
口述：熊黛林 筆錄：名人組