李思欣驚喜 喊嫁范振鋒

阿范與李思欣的結婚佳期定於明年1月15日，分別找了陳浩民、楊秀惠、周家蔚、梁嘉琪等當日擔任兄弟姊妹。因阿范未正式向思欣求婚，聲言會諗計給她一個驚喜，日前，他與大班好友Bobby、洪天明與女友周家蔚、元彪及晨曦足球隊的隊員出席飯局，夾計上演一場好戲。

扮嬲拉老婆走

話說當天Bobby吃飯時故意叫思欣猜枚，思欣猜輸了包剪揼要飲酒，阿范見狀即說：「咁多唔好飲！」Bobby就扮嬲行開，還作狀向阿范說：「輸咗唔飲咁冇品架。」隨即便拉太太走，阿范即說：「唔使嘞，我同思欣走。」令懵然不知的思欣不知所措，而向來疼錫思欣又毫不知情的元彪就挺身而出，準備勸交作「和事老」，此時阿范為免事件鬧大主動「穿煲」，拿出一卡鑽戒及花束，跪地向思欣求婚，待嫁的家蔚都感動到眼濕濕！

鑽戒每年加碼

事後思欣在電話中坦言當時整個人呆了，隔了一會才感動到喊，又讚阿范細心，預先叫她的家人到場，十足一場戲。她說：「冇諗過咁嘅場面，真係好『驚』喜！難怪之前又叫我化妝、又問我有冇攝錄機。（滿意嗎？）好滿意。（戒指成卡喎！）佢仲話如果賺到錢，每年增長大粒啲都冇所謂。」昨日思欣在微博感激一眾好友協助阿范，令她有個驚喜的求婚場面，並謝謝阿范送她最愛的香檳玫瑰。

文：影視組